തിരുവനന്തപുരം: വീട്ടുകാര്ക്ക് ലഹരി നല്കി മയക്കിക്കിടത്തി മോഷണം. വര്ക്കലയിലാണ് സംഭവം. വീട്ടുജോലിക്കാരിയായ നേപ്പാള് സ്വദേശിയാണ് ഭക്ഷണത്തില് ലഹരി കലര്ത്തി നല്കിയത്. വീട്ടുടമ ശ്രീദേവി, മരുമകള് ദീപ, ഹോം നഴ്സായ സിന്ധു എന്നിവരെ ആശുപത്രിയില് പ്രവേശിപ്പിച്ചു.
ചൊവ്വാഴ്ച്ച രാത്രിയിലാണ് സംഭവം നടന്നത്. രാവിലെ ബന്ധുക്കള് വീട്ടിലെത്തുമ്പോള് മൂന്ന് പേരെയും ബോധരഹിതരായി കണ്ടെത്തുകയായിരുന്നു. തുടര്ന്ന് ഇവരെ ആശുപത്രിയില് എത്തിച്ചു.
കവര്ച്ചക്ക് പിന്നില് അഞ്ചംഗ സംഘമാണെന്ന് പോലീസ് പറയുന്നു. ഇവരില് രണ്ട് പേരെ അയിരൂര് പോലീസ് കസ്റ്റഡിയിലെടുത്തിട്ടുണ്ട്. നാട്ടുകാര് പ്രദേശത്ത് നടത്തിയ പരിശോധനയിലാണ് ഇന്നലെ ഒരാളെ പിടികൂടിയത്. സ്വര്ണവും പണവുമായി രക്ഷപ്പെടന് ശ്രമിക്കുന്നതിനിടെയാണ് ഇയാള് പിടിയിലായത്. ഇന്ന് പ്രദേശത്ത് ഒളിച്ചിരുന്ന മറ്റൊരാളെയും നാട്ടുകാര് പിടികൂടി. സംഭവത്തില് പോലീസ് അന്വേഷണം ആരംഭിച്ചു.
