ന്യൂഡല്‍ഹി:പരീക്ഷാ പേ ചർച്ചയ്ക്കിടെ തൻ്റെ രാഷ്ട്രീയ ജീവിതത്തിലെ സമ്മർദ്ദത്തെ കുറിച്ച് ആരാഞ്ഞ കുട്ടിയ്ക്ക് പ്രധാനമന്ത്രി നൽകിയ മറുപടി വെെറലാവുന്നു. പ്രധാനമന്ത്രി എന്ന നിലയില്‍ സമ്മര്‍ദ്ദം എങ്ങനെ കൈകാര്യം ചെയ്യുന്നുവെന്നായിരുന്നു വിദ്യാർത്ഥിനിയുടെ കുറുമ്പ് ചോദ്യം. ഇതിന് അദ്ദേഹം നൽകിയ മറുപടി വിദ്യാർത്ഥികളിൽ ആത്മധെെര്യം നിറച്ചിരിക്കുകയാണ.
പത്ത് കോടി വെല്ലുവിളികള്‍ ഉണ്ടെങ്കില്‍, കോടിക്കണക്കിന് പരിഹാരങ്ങളുണ്ട്. ഓരോ വെല്ലുവിളികളും എനിക്ക് എപ്പോഴും പഠിക്കാനുള്ള അവസരം നല്‍കുന്നു. പുതിയ സാഹചര്യങ്ങള്‍ കൈകാര്യം ചെയ്യുന്നത് എന്നെ കൂടുതല്‍ സമ്പന്നനാക്കുന്നു. 140 കോടി രാജ്യക്കാര്‍ എന്നോടൊപ്പം ഉണ്ടെന്നതാണ് എന്റെ ഏറ്റവും വലിയ ആത്മവിശ്വാസം. എന്റെ രാജ്യത്തിന്റെയും നാട്ടുകാരുടെയും കഴിവുകളെക്കുറിച്ച് എനിക്ക് എപ്പോഴും ബോധ്യമുണ്ട്. ഇതാണ് എന്റെ ചിന്തയുടെ അടിസ്ഥാന ഘടകം, ”എന്നാണ് വിദ്യാര്‍ത്ഥികളുടെ ചോദ്യത്തിന് മറുപടിയായി പ്രധാനമന്ത്രി പറഞ്ഞത് .
ഒരിക്കല്‍ ജീവിതത്തില്‍ നിരാശപ്പെടേണ്ടെന്ന് തീരുമാനിച്ചാല്‍ പോസിറ്റിവിറ്റി മാത്രമേ നമ്മുടെ ജീവിതത്തില്‍ അവശേഷിക്കു . എന്റെ ജീവിതത്തിലെ നിരാശയുടെ എല്ലാ വാതിലുകളും ജനലുകളും ഞാന്‍ അടച്ചിരിക്കുന്നു,”എന്നും അദ്ദേഹം കൂട്ടിച്ചേര്‍ത്തു.
സാങ്കേതികവിദ്യ വിദ്യാര്‍ത്ഥികള്‍ ക്രിയാത്മകമായി ഉപയോഗപ്പെടുത്തി ഭാവി മെച്ചപ്പെടുത്തണമെന്നും പ്രധാനമന്ത്രി നരേന്ദ്ര മോദി പറഞ്ഞു. സാങ്കേതിക വിദ്യകള്‍ പഠനം കൂടുതല്‍ എളുപ്പമാക്കാന്‍ ഓരോ വിദ്യാര്‍ത്ഥികള്‍ക്കും സാധിക്കണം . കൂടാതെ ഇവ വിവേകത്തോടെ ഉപയോഗിക്കണമെന്ന മുന്നറിയിപ്പ് അദ്ദേഹം നല്‍കുകയും ചെയ്തു .
Discussion about this post