ചെന്നൈ: തമിഴ് രാഷ്ട്രീയത്തിന്റെ ഭാഗമായി ഇളയ ദളപതി വിജയ്യും. പുതിയ രാഷ്ട്രീയ പാർട്ടി പ്രഖ്യാപിച്ചു. രാഷ്ട്രീയ രംഗത്തെ മാറ്റം ലക്ഷ്യമിട്ടുകൊണ്ടുള്ള പാർട്ടിയ്ക്ക് തമിഴക വെട്രി കഴകം എന്നാണ് പേര് നൽകിയിരിക്കുന്നത്.
ഉച്ചയോടെ ഔദ്യോഗിക പ്രസ്താവനയിലൂടെയാണ് രാഷ്ട്രീയ പാർട്ടിയുടെ പേര് അദ്ദേഹം വെളിപ്പെടുത്തിയത്. പാർട്ടി രജിസ്റ്റർ ചെയ്യുന്നതിനായി തിരഞ്ഞെടുപ്പ് കമ്മീഷന് ഇന്ന് തന്നെ അപേക്ഷ നൽകുമെന്ന് വിജയ് വ്യക്തമാക്കി. നടക്കാനിരിക്കുന്ന ലോക്സഭാ തിരഞ്ഞെടുപ്പിൽ പാർട്ടി മത്സരിക്കില്ല. 2026 ലെ നിയമസഭാ തിരഞ്ഞെടുപ്പാണ് ലക്ഷ്യമിടുന്നത്. തമിഴ്നാട്ടിലെ ജനങ്ങൾ വലിയൊരു രാഷ്ട്രീയ മാറ്റം ആഗ്രഹിക്കുന്നുണ്ടെന്നും വിജയ് കൂട്ടിച്ചേർത്തു.
രാഷ്ട്രീയം തനിക്ക് ജോലിയല്ല. അത് ജനങ്ങൾക്കായി ചെയ്യുന്ന പുണ്യപ്രവൃത്തിയാണ്. ഇതിനായി വളരെകാലമായി താൻ തയ്യാറെടുക്കുകയാണ്. രാഷ്ട്രീയം കുട്ടിക്കളിയല്ല. ഇത് തന്നെ ആഴത്തിലുള്ള ആഗ്രഹം കൂടിയാണ്. അതിനാൽ പൂർണമായും ഇതിൽ മുഴുകുമെന്നും അദ്ദേഹം പറഞ്ഞു.
അടുത്തിടെ ചെന്നൈയിൽ നടന്ന യോഗത്തിൽ വിജയ്യുടെ ഫാൻസ് ക്ലബ്ബായ വിജയ് മക്കൾ ഇയക്കം രാഷ്ട്രീയ പാർട്ടി രൂപീകരിക്കുന്നതിന് അനുമതി നൽകിയിരുന്നു. ഇതേ തുടർന്നാണ് രാഷ്ട്രീയ പാർട്ടി സംബന്ധിച്ച പ്രഖ്യാപനം. തിരഞ്ഞെടുപ്പ് കമ്മീഷൻ തമിഴക വെട്രി കഴകത്തെ രാഷ്ട്രീയ പാർട്ടിയായി രജിസ്റ്റർ ചെയ്താൽ പാർട്ടി യോഗങ്ങളും പ്രവർത്തനങ്ങളും ആരംഭിക്കും.
Discussion about this post