ന്യൂഡൽഹി: രാജ്യത്തെ പരമോന്നത സിവിലിയൻ ബഹുമതിയ്ക്ക് തിരഞ്ഞെടുക്കപ്പെട്ടതിന് ശേഷം ആദ്യമായി പ്രതികരിച്ച് മുതിർന്ന ബിജെപി നേതാവ് എൽകെ അദ്വാനി. ഒരു വ്യക്തി എന്ന നിലയിൽ തനിക്ക് മാത്രമല്ല, താൻ കൂടെ നിൽക്കുന്ന ആദർശങ്ങൾക്കും തത്വങ്ങൾക്കും കൂടിയുള്ള ബഹുമതിയാണിതെന്ന് അദ്ദേഹം വ്യക്തമാക്കി.
അത്യന്തം വിനയത്തോടും കൃതജ്ഞതയോടും കൂടി, ഇന്ന് എനിക്ക് സമ്മാനിച്ച ‘ഭാരത് രത്ന’ ഞാൻ സ്വീകരിക്കുന്നു. ഇത് ഒരു വ്യക്തി എന്ന നിലയിൽ എനിക്ക് മാത്രമല്ല, ആദർശങ്ങൾക്കും തത്വങ്ങൾക്കും കൂടിയുള്ള ബഹുമതിയാണ്. എന്റെ കഴിവിന്റെ പരമാവധി എന്റെ ജീവിതകാലം മുഴുവൻ സേവിക്കാൻ എനിക്കുള്ള കരുത്താണെന്ന് അദ്ദേഹം പുറത്തിറക്കിയ പ്രസ്താവനയിൽ പറയുന്നു.
‘ഞാൻ രാഷ്ട്രീയ സ്വയംസേവക് സംഘിന്റെ സന്നദ്ധപ്രവർത്തകനായി ചേർന്നത് മുതൽ…. ജീവിതത്തിൽ തന്നെ ഏൽപ്പിച്ചിരിക്കുന്ന ഏത് ജോലിയിലും തന്റെ പ്രിയപ്പെട്ട രാജ്യത്തിന്റെ സമർപ്പിതവും നിസ്വാർത്ഥവുമായ സേവനത്തിൽ താൻ പ്രതിഫലം കൂടാതെ മുഴുകിയിട്ടുണ്ടെന്ന് അദ്ദേഹം ഓർത്തു.
ഇന്ന് രാവിലെയാണ് എൽകെ അദ്വാനിയെ ഭാരതരത്ന നൽകി ആദരിക്കുന്ന വിവരം പ്രധാനമന്ത്രി നരേന്ദ്രമോദി പ്രഖ്യാപിച്ചത്. 96 -ാം വയസ്സിലാണ് രാജ്യത്തിൻറെ പരമോന്നത സിവിലിയൻ അവാർഡ് അദ്വാനിയെ തേടിയെത്തുന്നത്. പൊതുരംഗത്തെ സംഭാവന പരിഗണിച്ചാണ് ഭാരതരത്ന സമ്മാനിക്കുന്നത്.
എൽകെ അദ്വാനിയെ പ്രധാനമന്ത്രി അഭിനന്ദിക്കുകയും ചെയ്തു. രാജ്യ വികസനത്തിന് അദ്വാനി നൽകിയത് മഹത്തായ മാതൃകകളെന്ന് പ്രധാനമന്ത്രി നരേന്ദ്രമോദി അഭിനന്ദന സന്ദേശത്തിൽ പറഞ്ഞു. രാഷ്ട്രത്തെ സേവിക്കാനായി ജീവിതം മാറ്റിവെച്ച് വ്യക്തിയാണ് എൽ കെ അദ്വാനി എന്നും, രാജ്യത്തിൻറെ വികസനത്തിനായി അദ്ദേഹം നൽകിയ സംഭവനകൾ ബൃഹത്താണ് എന്നും പ്രധാനമന്ത്രി നരേന്ദ്രമോദി പറഞ്ഞു. താഴേത്തട്ട് മുതൽ ഉപപ്രധാനമന്ത്രി എന്ന നിലയിൽ വരെ രാഷ്ട്രത്തെ സേവിച്ച ജീവിതമാണ് അദ്വാനിയുടേതെന്നും മോദി കൂട്ടിച്ചേർത്തു.
ഞങ്ങളുടെ കാലഘട്ടത്തിലെ ഏറ്റവും മികച്ച രാഷ്ട്ര തന്ത്രജ്ഞനാണ് അദ്വാനിജീ. നമ്മുടെ ആഭ്യന്തര മന്ത്രിയായി അദ്ദേഹം മികച്ച പ്രവർത്തനം നടത്തി. അദ്ദേഹത്തിൻറെ പാർലമെൻററി ഇടപെടലുകൾ എല്ലായ്പ്പോഴും മാതൃകാപരവും സമ്പന്നമായ ഉൾക്കാഴ്ചകൾ നിറഞ്ഞതുമാണ് എന്നും പ്രധാനമന്ത്രി പറഞ്ഞു.
Discussion about this post