പൂനെ: അശ്ലീല സഭാഷണങ്ങളും സീത ദേവി പുകവലിക്കുന്ന രംഗങ്ങളും ഉൾപ്പെടുത്തി രാമായണത്തെ വികലമാക്കി ചിത്രീകരിച്ചു കൊണ്ട് നാടകം അവതരിപ്പിച്ചതിനെ തുടർന്ന് പൂനെ സർവകലാശാലയിലെ ഒരു പ്രൊഫസറേയും അഞ്ച് വിദ്യാർത്ഥികളെയും ശനിയാഴ്ച പോലീസ് അറസ്റ്റ് ചെയ്തു. മത വികാരം വ്രണപ്പെടുത്തിയതിനാണ് കേസ് രജിസ്റ്റർ ചെയ്തിരിക്കുന്നത്.
നാടകത്തിൽ ആക്ഷേപകരമായ സംഭാഷണങ്ങളും രംഗങ്ങളും ആണുള്ളത് . സീതാ ദേവിയുടെ വേഷം ധരിച്ച ഒരു പുരുഷ നടൻ സിഗരറ്റ് വലിക്കുന്നതും ഇതിൽ കാണിക്കുന്നുണ്ട് . വെള്ളിയാഴ്ച വൈകീട്ട് അരങ്ങേറിയ നാടകത്തെച്ചൊല്ലി അഖില ഭാരതീയ വിദ്യാർത്ഥി പരിഷത്ത് പ്രവർത്തകരും പൂനെ സർവകലാശാലയുടെ ഭാഗമായ പൂനെ ലളിതകലാകേന്ദ്രത്തിലെ വിദ്യാർത്ഥികളും തമ്മിൽ വാക്കേറ്റമുണ്ടായി.
എബിവിപിയുടെ ഹർഷവർധൻ ഹർപുഡെ നൽകിയ പരാതിയുടെ അടിസ്ഥാനത്തിൽ ഇന്ത്യൻ ശിക്ഷാനിയമത്തിലെ സെക്ഷൻ 295 (എ) പ്രകാരവും മറ്റ് പ്രസക്തമായ വകുപ്പുകൾ പ്രകാരവും കേസെടുത്തതായി പോലീസ് ഇൻസ്പെക്ടർ അങ്കുഷ് ചിന്താമൻ പറഞ്ഞു.
പ്രഥമ വിവര റിപ്പോർട്ട് (എഫ്ഐആർ) അനുസരിച്ച്, സീതയുടെ വേഷം ചെയ്യുന്ന ഒരു പുരുഷ നടൻ പുകവലിയിൽ ഏർപ്പെടുന്നതും നിന്ദ്യമായ ഭാഷ ഉപയോഗിക്കുന്നതും നാടകത്തിൽ കാണാം.
സംഭവവുമായി ബന്ധപ്പെട്ട് ലളിതകലാ കേന്ദ്ര വിഭാഗം മേധാവി ഡോ.പ്രവീൺ ഭോലെ, വിദ്യാർഥികളായ ഭവേഷ് പാട്ടീൽ, ജയ് പെഡ്നേക്കർ, പ്രഥമേഷ് സാവന്ത്, ഋഷികേശ് ദാൽവി, യാഷ് ചിഖ്ലെ എന്നിവരെ പൊലീസ് അറസ്റ്റ് ചെയ്തിട്ടുണ്ട്.
Discussion about this post