കണ്ണൂർ : കണ്ണൂരിൽ തെയ്യത്തിന് നേരെ ആക്രമണം. ഏറെ പ്രശസ്തമായ കൈതചാമുണ്ഡി തെയ്യം ചടങ്ങുകൾ നടക്കുന്നതിനിടയിൽ ആയിരുന്നു തെയ്യക്കോലം കെട്ടിയ ആളെ ഒരു വിഭാഗം ആളുകൾ ചേർന്ന് തല്ലി പരിക്കേൽപ്പിച്ചത്. തെയ്യത്തെ കണ്ട് ഒരു കുട്ടി പേടിച്ചോടി വീണു പരിക്കേറ്റത്തിന്റെ പേരിലാണ് തെയ്യത്തിന് നേരെ ഒരു വിഭാഗം ആളുകളുടെ ആക്രമണം ഉണ്ടായത്.
കണ്ണൂർ തില്ലങ്കേരിയിൽ വച്ച് ഇന്നലെ വൈകിട്ട് ആയിരുന്നു തെയ്യത്തിന് നേരെ ആക്രമണം ഉണ്ടായത്. പെരിങ്ങാനം ഉദയംകുന്ന് മടപ്പുര ഉത്സവം നടക്കുന്ന സമയമായിരുന്നു. ഇവിടെ ഏറെ പ്രശസ്തമാണ് കൈതചാമുണ്ഡി തെയ്യം. ചടങ്ങുകളുടെ തുടർച്ചയായി കൈതയോല വെട്ടി തെയ്യം മടപ്പുരയിലേക്ക് മടങ്ങുന്ന ആചാരം നടക്കുന്നതിനിടയിൽ വഴിയിൽ വെച്ച് ഒരു കുട്ടി തെയ്യത്തെ കണ്ടു പേടിച്ചോടുകയും വീണു പരിക്ക് പറ്റുകയും ചെയ്യുകയായിരുന്നു.
കുട്ടിക്ക് പരിക്ക് പറ്റിയതോടെ ഒരു വിഭാഗം ആളുകൾ തെയ്യക്കോലം കെട്ടിയ ആൾക്ക് നേരെ ആക്രമണം നടത്തുകയായിരുന്നു. വഴിയിൽവെച്ച് ഇവർ തെയ്യത്തെ പൊതിരെ തല്ലി. തുടർന്ന് നാട്ടുകാരും പോലീസും പ്രശ്നത്തിൽ ഇടപെട്ട് ഇവരെ പിടിച്ചു മാറ്റുകയായിരുന്നു. ചടങ്ങിനിടയിൽ അനിഷ്ട സംഭവങ്ങൾ ഉണ്ടായാൽ കടുത്ത നടപടി ഉണ്ടാകും എന്ന് പോലീസ് മുന്നറിയിപ്പ് നൽകിയതോടെ തെയ്യത്തെ ആക്രമിച്ച ഒരു വിഭാഗം ആളുകൾ പിന്മാറുകയായിരുന്നു.
