ലക്നൗ: വരുന്ന രാജ്യസഭാ തിരഞ്ഞെടുപ്പിനായി യുപിയിൽ ബിജെപിയുടെ എട്ടാമത്തെ രാജ്യസഭാ സ്ഥാനാർത്ഥിയും നാമനിർദേശ പത്രിക സമർപ്പിച്ചു. മുൻ രാജ്യസഭാ എംപി സഞ്ജയ് സേത്താണ് നാമനിർദേശ പത്രിക സമർപ്പിച്ചിരിക്കുന്നത്. ഉത്തർപ്രദേശ് ഉപമുഖ്യമന്ത്രി കേശവ് പ്രസാദ് മൗര്യയുടെയും മറ്റ് പാർട്ടി നേതാക്കളുടെയും സാന്നിദ്ധ്യത്തിലാണ് നാമനിർദേശ പത്രിക സമർപ്പിച്ചത്.
‘ഇന്ന് ഞങ്ങളുടെ എട്ടാമത്തെ രാജ്യസഭാ സ്ഥാനാർത്ഥിയായി സഞ്ജയ് സേത്ത് നാമനിർദേശം ചെയ്യപ്പെട്ടിരിക്കുന്നു. അദ്ദേഹത്തെ അഭിനന്ദിക്കുന്നു’എന്ന് ഉപമുഖ്യമന്ത്രി പറഞ്ഞു. പ്രധാനമന്ത്രിയുടെ നേതൃത്വത്തിൽ രാജ്യം ഇന്ന് അതിവേഗം പുരോഗമിക്കുകയാണ്. നിയമസഭയിൽ ഞങ്ങൾക്ക് ഭൂരിപക്ഷമുണ്ട്. അതിനാൽ മികച്ച നേട്ടം കരസ്ഥമാക്കാൻ ഞങ്ങൾക്ക് കഴിയും എന്ന് അദ്ദേഹം കൂട്ടിച്ചേർത്തു.
ആർപിഎൻ സിംഗ്, ചൗധരി തേജ്വീർ സിംഗ്, അമർപാൽ മൗര്യ, സംഗീത ബൽവന്ത്, സുധാൻഷു ത്രിവേദി, സാധന സിംഗ്, നവീൻ ജെയിൻ എന്നിവർ ഇന്നലെ നാമനിർദേശ പത്രിക സമർപ്പിച്ചിരുന്നു. മുഖ്യമന്ത്രി യോഗി ആദിത്യനാഥിന്റെ സാന്നിദ്ധ്യത്തിലാണ് നാമനിർദേശ പത്രിക സമർപ്പിച്ചത്.
15 സംസ്ഥാനങ്ങളിലെ ഒഴിവുവന്ന 56 രാജ്യസഭാ സീറ്റുകളിലേക്കുള്ള തിരഞ്ഞെടുപ്പാണ് നടക്കുന്നത്. ഫെബ്രുവരി 27നാണ് തിരഞ്ഞെടുപ്പ് നടക്കുക. 27ന് രാവിലെ 9 മുതൽ വൈകീട്ട് 4 വരെ വോട്ടെടുപ്പ് നടക്കും. വൈകീട്ട് 5ന് വോട്ടെണ്ണൽ നടക്കും. നാമനിർദേശപത്രിക സമർപ്പിക്കാനുള്ള അവസാന തീയതി ഇന്നാണ്.
Discussion about this post