ലണ്ടൻ: ഭാരത്തിൽ ലോക്സഭാ തിരഞ്ഞെടുപ്പ് നടക്കാനിരിക്കെ പ്രത്യേക ഭാരവാഹി യോഗം ചേർന്ന് ഒഎഫ്ബിജെപി യുകെ കേരളാ ചാപ്റ്റർ. കഴിഞ്ഞ ദിവസം ഈസ്റ്റ് ലണ്ടനിലെ ദെഗൻഹാമിലെ ഫാൻഷ്വേ കമ്മ്യൂണിറ്റി സെന്ററിൽ ആയിരുന്നു യോഗം. തിരഞ്ഞെടുപ്പുമായി ബന്ധപ്പെട്ട വിവിധ വിഷയങ്ങൾ യോഗത്തിൽ ചർച്ചയായി.
ഒഎഫ്ബിജെപി യുകെ കേരളാ ചാപ്റ്റർ സംയോജകരായ സുഭാഷ് ശശിധരൻ, ലക്ഷ്മി പിള്ള എന്നിവരുടെ നേതൃത്വത്തിലായിരുന്നു യോഗം. സംഘടനയുടെ തിരഞ്ഞെടുപ്പ് പ്രവർത്തനങ്ങൾ ഏകോപിപ്പിക്കുന്നതിനും, വിവിധ പരിപാടിയിൽ പങ്കാളിത്തം ഉറപ്പാക്കുന്നതിനുമായി സുനിൽ സോമൻ കൺവീനർ ആയി ഒരു കമ്മിറ്റിയെ തിരഞ്ഞെടുത്തു. യോഗത്തിൽ അംഗങ്ങളായ സൂരജ് രാമചന്ദ്രദേവ്, രാഹുൽ കെ പി എന്നിവരെ മീഡിയ കോ ഓർഡിനേറ്റർ മാരായും, തോമസ് ജോസിനെ സമ്പർക്ക പ്രമുഖ് ആയും, ജന്റിൽ നായരെ ഖജാൻജി ആയും ചുമതലപ്പെടുത്തി.
ഒഎഫ് ബിജെപിയുടെ അഭിമുഖ്യത്തിൽ നോർത്ത് ലണ്ടനിൽ സംഘടിപ്പിക്കുന്ന കാർ റാലികൾ, സെമിനാറുകൾ, കവി സദസ്സ് തുടങ്ങിയ പരിപാടികൾ സംഘടിപ്പിക്കുന്നുണ്ട്. ഇതിൽ കേരള ചാപ്റ്ററിന്റെ പ്രാതിനിധ്യം ഉറപ്പിക്കുന്നതിനൊപ്പം കേരളത്തിന്റെ പ്രത്യേക രാഷ്ട്രീയ സാഹചര്യങ്ങളെ കണക്കിലെടുത്ത് യുകെ യിൽ നിന്നുള്ള പ്രവർത്തങ്ങളെ ഏകോപിപ്പിക്കുക എന്നതാണ് കമ്മിറ്റിയുടെ ലക്ഷ്യം.
മുൻകാലങ്ങളിൽ പാർലമെന്റ് നിയമസഭാ തിരഞ്ഞെടുപ്പുകളിൽ നടത്തിയിട്ടുള്ള സമ്പർക്കങ്ങൾക്കും ഫോൺ ക്യാമ്പയിനുകൾക്കും പുറമെ യുകെയിലെ വിവിധ റീജിയണൽ കൂട്ടായ്മകളുടെ യോഗങ്ങൾ സംഘടിപ്പിക്കാനും, രാഷ്ട്രീയ സാമൂഹിക സാംസ്കാരിക മേഖലകളിൽ പ്രവർത്തിക്കുന്ന ആളുകളുമായി സംവദിക്കാനും യോഗത്തിൽ ഇലക്ഷൻ കമ്മിറ്റിയെ ചുമതലപ്പെടുത്തി. ഇതിന് പുറമേ മോദിയുടെ നേതൃത്വത്തിൽ അഴിമതി രഹിത ഭരണം കാഴ്ച വച്ച് കഴിഞ്ഞ 10 വർഷം കൊണ്ട് ഭാരതം കൈവരിച്ച നേട്ടങ്ങൾ ഭാരതീയ സംസ്കൃതിയിൽ താല്പര്യം ഉള്ള ഓരോ വ്യക്തികളിലേക്കും എത്തിക്കാനായി വിവിധ പരിപാടികൾ സംഘടിപ്പിക്കാനും തീരുമാനമായി.
