ന്യൂഡൽഹി: ഇന്ത്യൻ പ്രധാനമന്ത്രി നരേന്ദ്ര മോദിയെ മുക്തകണ്ഠം പ്രശംസിച്ച് ഗ്രീക്ക് പ്രധാനമന്ത്രി കിരിയാക്കോസ് മിത്സോതാകിസ്. അദ്ദേഹത്തിൽ ദീർഘവീക്ഷണമുള്ള ഒരു നേതാവിനെയും ഒരു യഥാർത്ഥ സുഹൃത്തിനെയും താൻ കണ്ടെത്തിയെന്നും, ഇന്ത്യ-ഗ്രീസ് ബന്ധം വെറും ഉഭയകക്ഷി ബന്ധങ്ങൾക്ക് അപ്പുറത്താണെന്നും ഗ്രീക്ക് പ്രധാനമന്ത്രി കൂട്ടിച്ചേർത്തു.
കഴിഞ്ഞ വര്ഷം ഓഗസ്റ്റിൽ ഗ്രീസ് സന്ദർശിച്ചതോടെ പ്രധാനമന്ത്രി നരേന്ദ്ര മോദി, 40 വർഷത്തിന് ശേഷം ഗ്രീസ് സന്ദർശിക്കുന്ന ആദ്യ ഇന്ത്യൻ പ്രധാനമന്ത്രി ആയി മാറിയിരുന്നു. ഇത് ഇരു രാജ്യങ്ങളും തമ്മിലുള്ള ബന്ധത്തിലെ ഒരു സുപ്രധാന നയതന്ത്ര നാഴികക്കല്ലായാണ് വിലയിരുത്തപ്പെടുന്നത്. ഇന്ത്യയും ഗ്രീസും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുക എന്ന ലക്ഷ്യത്തോടെയായിരുന്നു ഈ സന്ദർശനം, ഗ്രീക്ക് പ്രധാനമന്ത്രി കിരിയാക്കോസ് മിത്സോതാകിസിൻ്റെ ക്ഷണപ്രകാരമായിരുന്നു അന്നത്തെ ആ സന്ദർശനം. ഇതിന്റെ തുടർച്ചയായാണ് ഗ്രീസ് പ്രധാനമന്ത്രിയുടെ ഇന്ത്യ സന്ദർശനം.
ഇന്ത്യയുമായുള്ള നമ്മുടെ ബന്ധത്തിൻ്റെ പ്രാധാന്യം കഴിഞ്ഞ വർഷം നമ്മുടെ ഉഭയകക്ഷി ബന്ധങ്ങളുടെ വർദ്ധനവിൽ മാത്രമല്ല, ഇരു രാജ്യങ്ങളും യോജിച്ചു വികസിപ്പിച്ചെടുത്ത ബഹു മുഖ പങ്കാളിത്തത്തിലും പ്രകടമാണെന്ന് ഗ്രീക്ക് പ്രധാനമന്ത്രി കൂട്ടിച്ചേർത്തു . കൃഷി, പ്രതിരോധം തുടങ്ങിയ നിർണായക മേഖലകളിൽ കഴിഞ്ഞ വർഷം ഞങ്ങൾ ധാരണാപത്രം ഒപ്പുവച്ചതായി ഇരു രാജ്യങ്ങളിലെയും പ്രധാനമന്ത്രിമാർ പുറത്തു വിട്ട സംയുക്ത പ്രസ്താവനയിൽ വ്യക്തമാക്കി.
ഈ വർഷം ഇന്ത്യയും ഗ്രീസും കുടിയേറ്റം സംബന്ധിച്ച് വളരെ പ്രധാനപ്പെട്ട ഒരു കരാർ വികസിപ്പിച്ചു കൊണ്ടിരിക്കുകയാണ് . നിയമപരമായ കുടിയേറ്റം, മനുഷ്യക്കടത്ത് തടയൽ തുടങ്ങിയ പ്രശ്നങ്ങളിൽ നമ്മുടെ സഹകരണം ശക്തിപ്പെടുത്തുന്നതിനുള്ള ഒരു സുപ്രധാന ചുവടുവയ്പ്പാകും അത് , മാത്രമല്ല ഇന്ത്യയിലെ യുവാക്കൾക്ക് ഗ്രീസിൽ വന്ന് ജോലി ചെയ്യാനും നമ്മുടെ സമ്പദ്വ്യവസ്ഥയുടെ വളർച്ചയിൽ നിന്നും നമ്മുടെ ബന്ധം ശക്തിപ്പെടുത്തുന്നതിനുള്ള സാധ്യതകളിൽ നിന്നും പ്രയോജനം നേടാനും ഞങ്ങൾ അവസരമൊരുക്കും. ,” അദ്ദേഹം കൂട്ടിച്ചേർത്തു.
ഗ്രീക്ക് പ്രധാനമന്ത്രി കിരിയാക്കോസ് മിത്സോതാകിസ് ചൊവ്വാഴ്ചയാണ് രാജ്യ തലസ്ഥാനത്തെത്തിയത്. കേന്ദ്ര വിദേശകാര്യ സഹമന്ത്രി മീനാക്ഷി ലേഖി ഗ്രീക്ക് പ്രധാനമന്ത്രിയെ വിമാനത്താവളത്തിൽ സ്വീകരിച്ചു.ഗാർഡ് ഓഫ് ഓണർ സ്വീകരിച്ച ശേഷം, ഇന്ത്യയുമായുള്ള തന്ത്രപരമായ പങ്കാളിത്തം ഗ്രീസ് വളരെ പ്രാധാന്യത്തോടെയാണ് കാണുന്നതെന്നും അതിനാൽ തന്നെ പ്രധാനമന്ത്രി മോദിയുമായുള്ള ഉഭയകക്ഷി ചർച്ചകൾക്ക് വലിയ പ്രാധാന്യമാണ് നൽകുന്നതെന്നും ഗ്രീക്ക് പ്രധാനമന്ത്രി പറഞ്ഞിരുന്നു.
