തിരുവനന്തപുരം: വിവാദപരമായ സിഎംആർഎൽ-എക്സാലോജിക് സാമ്പത്തിക ഇടപാടിൽ എൻഫോഴ്സ്മെന്റ് ഡയറക്ടറേറ്റ് (ഇ.ഡി) നൽകിയ റിപ്പോർട്ട് അതേപടി വിഴുങ്ങില്ലെന്ന നിലപാടിലേക്ക് സംസ്ഥാന സർക്കാർ. ആരോപണങ്ങളെ അന്ധമായി പിന്തുടരാതെ, സ്വന്തം അന്വേഷണ സംവിധാനങ്ങളിലൂടെ വസ്തുതകൾ ബോധ്യപ്പെട്ടാൽ മാത്രം തുടർനടപടികളിലേക്ക് പോയാൽ മതിയെന്ന് സർക്കാർ തീരുമാനമെടുത്തു.
ഇ.ഡിയുടെ അടിസ്ഥാന രേഖകളെയും വാദങ്ങളെയും വിശ്വസിക്കുന്നതിന് മുൻപ്, ആരോപണങ്ങളുടെ സത്യാവസ്ഥ സംസ്ഥാന പോലീസ് അന്വേഷിച്ച് വ്യക്തത വരുത്താനാണ് ആഭ്യന്തര വകുപ്പിന്റെ തീരുമാനം. കേസിൽ നേരിട്ട് കേസെടുക്കുന്നതിന്റെ രാഷ്ട്രീയ പ്രത്യാഘാതങ്ങൾ മുൻകൂട്ടി കണ്ടാണ് സർക്കാർ ഈ കരുതലോടെയുള്ള വഴി തിരഞ്ഞെടുത്തത്. ഇതിൻ്റെ ആദ്യപടിയായി കൈക്കൂലിയുമായി ബന്ധപ്പെട്ട ആരോപണങ്ങളും ഹവാല പണമിടപാടുകളും വെവ്വേറെയായിരിക്കും സംസ്ഥാന ഏജൻസികൾ പരിശോധിക്കുക.
പ്രധാനമായും അഴിമതി നിരോധന നിയമത്തിന് കീഴിൽ വരുന്ന കാര്യങ്ങൾ സംസ്ഥാന വിജിലൻസിൻ്റെ പരിധിയിൽ വരുമ്പോൾ, വിദേശ പണമിടപാടും ഹവാല ആരോപണങ്ങളും ക്രൈംബ്രാഞ്ചോ ഇക്കണോമിക് ഒഫൻസ് വിംഗോ പ്രത്യേകം പരിശോധിക്കും. നേരിട്ട് എഫ്.ഐ.ആർ രജിസ്റ്റർ ചെയ്യുന്നതിന് പകരം ക്രൈംബ്രാഞ്ചിന്റെ പ്രാഥമിക അന്വേഷണത്തിലൂടെ (Preliminary Inquiry) ആരോപണങ്ങളിൽ കാമ്പുണ്ടോ എന്ന് ഉറപ്പുവരുത്തും. ഇതിനുശേഷമായിരിക്കും തുടർനടപടികളിൽ അന്തിമ തീരുമാനമെടുക്കുക
