കോഴിക്കോട് : സിപിഐഎം നേതാവ് പി വി സത്യനാഥനെ കൊലപ്പെടുത്തിയ സംഭവത്തിൽ പരാതിയുമായി ബിജെപി. സത്യനാഥന്റെ കൊലപാതകവുമായി ബന്ധപ്പെട്ട് സിപിഐഎം നേതാക്കൾ ആർഎസ്എസിനെതിരെ കുപ്രചരണം നടത്തിയെന്നാണ് ബിജെപി വ്യക്തമാക്കുന്നത്. ഈ സിപിഐഎം നേതാക്കൾക്കെതിരെ കലാപാഹ്വാനത്തിന് കേസെടുക്കണം എന്നാണ് ബിജെപി പരാതിയിൽ ഉന്നയിക്കുന്നത്.
എം സ്വരാജ്, എം വിജിൻ എംഎൽഎ എന്നിവർക്കെതിരായാണ് ബിജെപി പരാതി നൽകിയിട്ടുള്ളത്. സത്യനാഥന്റെ കൊലപാതകത്തിന്റെ പിന്നിൽ ആർഎസ്എസ് ആണെന്ന വ്യാജമായ വാർത്ത പ്രചരിപ്പിച്ചതിന്റെ പേരിലാണ് ഇവർക്കെതിരെ പരാതി നൽകിയിരിക്കുന്നത്. സമൂഹമാദ്ധ്യമങ്ങളിലൂടെയാണ് എം സ്വരാജ് അടക്കമുള്ളവർ സത്യനാഥന്റെ കൊലപാതകത്തിന് പിന്നിൽ ആർഎസ്എസ് ആണെന്ന് പ്രചരിപ്പിച്ചിരുന്നത്.
പിന്നീട് സിപിഐഎം പ്രവർത്തകനായ പ്രതി അറസ്റ്റിൽ ആയതോടെ ഇവർ സമൂഹമാദ്ധ്യമങ്ങളിൽ നിന്നും ഈ പരാമർശം നീക്കം ചെയ്യുകയായിരുന്നു. സംഭവത്തിൽ സിപിഐഎം നേതാക്കൾക്കെതിരെ കേസെടുക്കണമെന്ന് ആവശ്യപ്പെട്ട് കോഴിക്കോട് സിറ്റി പോലീസ് കമ്മീഷണർക്കാണ് പരാതി നൽകിയിട്ടുള്ളത്.
Discussion about this post