എറണാകുളം: എസ്എഫ്‌ഐക്കാരെ പേടിച്ച് മക്കളെ കോളേജിൽ വിടാൻ സാധിക്കാത്ത സ്ഥിതിയാണ് ഇന്നുള്ളതെന്ന് പെൻഷൻ ലഭിക്കാത്തതിനെതിരെ ശക്തമായ പ്രതിഷേധവുമായി രംഗത്ത് എത്തിയ മറിയക്കുട്ടി. ഇടത് സർക്കാരിന്റെ ഭരണത്തിൽ കേരളത്തിലെ ജനങ്ങൾ പൊറുതിമുട്ടിയിരിക്കുകയാണ്. പിണറായി സർക്കാർ സമ്പൂർണ പരാജയം ആയെന്നും മറിയക്കുട്ടി പറഞ്ഞു. അന്താരാഷ്ട്ര വനിതാ ദിനത്തിന്റെ ഭാഗമായി ബിഎംഎസ് എറണാകുളം ജില്ലാ കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച വനിതാ സമ്മേളനത്തിൽ സംസാരിക്കുകയായിരുന്നു അവർ.
ഇടത് സർക്കാരിന്റെ ഭരണത്തിൽ കേരളത്തിലെ ജനങ്ങൾ പൊറുതി മുട്ടിയിരുന്നു. സാധാരണക്കാർക്ക് ഏഴ് മാസമായി പെൻഷനില്ല. സർക്കാർ ജീവനക്കാർക്ക് ശമ്പളം നൽകാൻ സർക്കാരിന് കഴിയുന്നില്ല. സമ്പൂർണപരാജയമായി പിണറായി സർക്കാർ മാറിയിരിക്കുന്നു. പിണറായി സർക്കാർ അധികാരത്തിലേറിയതിന് പിന്നാലെ സംസ്ഥാനത്ത് അക്രമം മാത്രമാണ് അരങ്ങേറുന്നത്. എസ്എഫ്‌ഐക്കാരെ പേടിച്ച് രക്ഷിതാക്കൾക്ക് മക്കളെ കോളേജിൽ വിടാൻ പോലും സാധിക്കുന്നില്ലെന്നും മറിയക്കുട്ടി പറഞ്ഞു.
പരിപാടിയിൽ വോക്കൽ ഫോർ ലോക്കൽ എന്റർപ്രണേഴ്സ് ഫോറം ഫൗണ്ടർ ആൻഡ് ചെയർപേഴ്സൺ സി.വി. സജിനി സംസാരിച്ചു. സ്ത്രീശാക്തീകരണത്തിനായി കേന്ദ്രസർക്കാർ നടപ്പാക്കിയിരുന്ന വിവിധ പദ്ധതികളെക്കുറിച്ചായിരുന്നു സജിനി പരിപാടിയിൽ വ്യക്തമാക്കിയത്. ഇവർക്ക് പുറമേ പരിപാടിയിൽ സ്ത്രീകളിലെ ആരോഗ്യപ്രശ്നങ്ങളും പരിഹാരങ്ങളും എന്ന വിഷയത്തിൽ അക്ഷയ ആശുപത്രി ചീഫ് ഗൈനക്കോളജിസ്റ്റും സയന്റിഫിക് ഡയറക്ടറുമായ ഡോ. ശശികല വി. പ്രഭുവും ഡോ. അക്ഷയ് വി. പ്രഭുവും സംസാരിച്ചു.
ബിഎംഎസ് സംസ്ഥാന സെക്രട്ടറി ദേവു ഉണ്ണി, ജില്ലാ വൈസ് പ്രസിഡന്റ് ഷൈല മോഹൻ, ജില്ല ജോയിന്റ് സെക്രട്ടറി സംഗീത രമേശ്, അങ്കണവാടി യൂണിയൻ ജില്ലാ സെക്രട്ടറി കെ.സി. സിന്ധു എന്നിവരും പരിപാടിയിൽ പങ്കെടുത്തു.
Discussion about this post