ഇഷ്ടപ്പെട്ടയാളെ വിവാഹം കഴിച്ച് ജീവിതത്തിലേക്ക് കൂട്ടുക എന്നത് എല്ലാവരുടെയും സ്വപ്നങ്ങളിലൊന്നാവും. അത് പോലെ ഉള്ള സ്വപ്ന സാക്ഷാത്ക്കാരത്തിനാണ് നാളെ ഹരിയാനയിലെ സോനിപത്തിലെ ജതേഡി ഗ്രാമം സാക്ഷിയാകുക. വിവാഹിതരാകുന്നതാകട്ടെ ചില്ലറക്കാരല്ല. ഗുണ്ടാത്തലവന്മാരായ കാലാ ജതേഡിയുടെയം റിവോൾവർ റാണിയെന്നറിയപ്പെടുന്ന അനുരാധാ ചൗധരിയുടെയും വിവാഹമാണ് നടക്കാൻ പോകുന്നത്.ഒട്ടേറെ ക്രിമിനൽക്കേസുകളിൽ പ്രതികളായ ഇരുവരും 2020 മുതൽ അടുപ്പത്തിലാണ്.
കോടതിയുടെ പ്രത്യേക അനുമതിയോടെ അതും ഇരുന്നൂറിലധികം പോലീസുകാരുടെ കാവലിലാണ് ഇരുവരുടെയും വിവാഹം. തിഹാർ ജയിലിലുള്ള വരൻ കാലാ ജഠെഡിക്ക് വിവാഹത്തിനായി ഡൽഹി കോടതി പരോൾ അനുവദിച്ചിരുന്നു. പ്രതിക്ക് സുരക്ഷയൊരുക്കണമെന്ന് കോടതി നിർദേശമുള്ളതിനാൽ ഡൽഹി പോലീസ് സ്പെഷ്യൽ സെൽ, ക്രൈംബ്രാഞ്ച്, ഹരിയാണയിലെ സി.ഐ.എ. തുടങ്ങി വിവിധ ഏജൻസികളിൽനിന്നുള്ള ഇരുന്നൂറിലേറെ പോലീസുകാർ വിവാഹത്തിന് കാവലൊരുക്കും. രാവിലെ 10 മുതൽ നാലുവരെയാണ് ചടങ്ങ്. 150 പേർക്കാണ് ക്ഷണം. 2022 ജൂണിൽ നടന്ന പഞ്ചാബി ഗായകൻ സിദ്ധു മൂസവാലയുടെ കൊലപാതത്തെക്കുറിച്ചുള്ള അന്വേഷണത്തിനിടെയാണ് ‘മാഡം മിൻസ്’ എന്നറിയപ്പെടുന്ന അനുരാധയുടെ പേര് സംശയാസ്പദമായി ഉയർന്നു വന്നത്.
എംബിഎ വിദ്യാർത്ഥിനിയായിരുന്നപ്പോൾ ഫെലിക്സ് ദീപക് മിൻസ് എന്ന ആളുമായി അനുരാധ പ്രണയത്തിലായിരുന്നു. എന്നാൽ, അനുരാധയുടെ ബന്ധുക്കൾ ഈ ബന്ധത്തെ എതിർത്തു. ഇരുവീട്ടുകാരുടെയും എതിർപ്പ് അവഗണിച്ച് ഇരുവരും വിവാഹിതരായി. ഷെയർ ട്രേഡിംഗ് ബിസിനസ്സിലേക്ക് കടന്ന ഇരുവർക്കും ഷെയർ മാർക്കറ്റ് ട്രേഡിംഗിൽ ആദ്യകാലത്ത് വലിയ ലാഭം നേടാനായി. എന്നാൽ, ട്രേഡിംഗ് ബിസിനസിലെ ചതിയിലൂടെ പണം നഷ്ടമായ അനുരാധ വലിയ കടക്കെണിയിൽ അകപ്പെട്ടു. കേസുമായി അവർ പോലീസ് സ്റ്റേഷനിൽ പോയെങ്കിലും പോലീസ് കേസ് താമസിപ്പിച്ചു. ഇതിനിടെ ബാധ്യത തീർക്കാൻ അനുരാധ ക്രിമിനൽ സംഘങ്ങളുമായി കൈകോർത്തു.
ഈ സമയത്താണ് ബൽബീർ ബനുദ എന്ന കുറ്റവാളി രാജസ്ഥാനിലെ ഗുണ്ടാ സംഘം തലവനായ ആനന്ദ്പാൽ സിംഗിനെ അനുരാധയ്ക്ക് പരിചയപ്പെടുത്തി കൊടുക്കുന്നത്. ആനന്ദ്പാൽ സിങ്ങിൽ നിന്ന് അവർ സാമ്പത്തിക സഹായം തേടുകയും താമസിയാതെ അയാളുടെ സംഘത്തിൽ ചേരുകയും ചെയ്തു. ഇക്കാലത്ത് അവർ ആനന്ദ് പാലിനെ ഇംഗ്ലീഷും നല്ല വസ്ത്രധാരണരീതിയും പഠിപ്പിച്ചു. സാധാരണ രീതിയിൽ വസ്ത്രം ധരിക്കുന്ന ഗ്രാമീണനായിരുന്നു ആനന്ദ് പാൽ. ഇതേസമയം, ആനന്ദ് പാൽ അനുരാധയെ എകെ 47 ഉപയോഗിക്കേണ്ടത് എങ്ങനെയാണെന്ന് പഠിപ്പിച്ചു. ഇതിനോടൊപ്പം ആധുനിക ആയുധങ്ങൾ ഉപയോഗിക്കേണ്ട രീതികളും അയാൾ അനുരാധയെ പഠിപ്പിച്ചു. വൈകാതെ തന്നെ ആനന്ദ്പാലിന്റെ സംഘത്തിലെ സുപ്രധാന കണ്ണിയായി അവർ മാറി.
2016ൽ ഇരുവരും വേർപിരിഞ്ഞു. 2017 ജൂൺ 24-ന് രാജസ്ഥാനിലെ സികാറിൽവെച്ചുണ്ടായ പോലീസ് ഏറ്റുമുട്ടലിൽ ആനന്ദ് പാൽ കൊല്ലപ്പെട്ടു.ഈ സമയം മറ്റൊരു തട്ടിക്കൊണ്ട് പോകൽ കേസിൽ അനുരാധ ജയിലിലായിരുന്നു. ജയിൽ മോചിതയായ അനുരാധ ഡൽഹിയിലേക്ക് താമസം മാറി. അവിടെ വച്ച് മറ്റൊരു ഗുണ്ടാതലവനായ ലോറൻസ് ബിഷ്ണോയിയുമായി ബന്ധം സ്ഥാപിച്ചു. ഇതിനിടെ കാലാ ജഠെഡിയെ പരിചയപ്പെട്ടു പിന്നാലെ ഇരുവരും പ്രണയത്തിലാകുന്നു. 2021 ജൂലൈ 31 ന് ഉത്തരാഖണ്ഡിൽ നിന്ന് മടങ്ങുമ്പോൾ ഉത്തർപ്രദേശിലെ സഹാറൻപൂരിൽ നിന്ന് അനുരാധയെയും കാലാ ജഠെഡിയെയും രാജസ്ഥാൻ പോലീസ് അറസ്റ്റ് ചെയ്യുകയായിരുന്നു
