ന്യൂഡൽഹി: അശ്ലീല ഉള്ളടക്കം സംപ്രേഷണം ചെയ്യുന്ന ഒടിടി പ്ലാറ്റ്ഫോമുകൾക്കെതിരെ കർശന നടപടിയുമായി കേന്ദ്രം. കേന്ദ്രവാർത്താ വിതരണ മന്ത്രാലയം പ്ലാറ്റ്ഫോമുകളുടെ പ്രവർത്തനം തടഞ്ഞു. തുടർച്ചയായി അശ്ലീല ഉള്ളടക്കങ്ങൾ മാത്രം സംപ്രേഷണം ചെയ്ത 18 ഒടിടി പ്ലാറ്റ്ഫോമുകൾക്കെതിരെയാണ് നടപടി.
അശ്ലീല ഉള്ളടക്കങ്ങൾ സംപ്രേഷണം ചെയ്തതിനെ തുടർന്ന് മന്ത്രാലയത്തിന് പരാതി ലഭിച്ചിരുന്നു. ഇതേ തുടർന്ന് നിരവധി തവണയാണ് ഇവയ്ക്ക് മുന്നറിയിപ്പ് നൽകിയത്. എന്നാൽ ഇതെല്ലാം തുടർച്ചയായി പ്ലാറ്റ്ഫോമുകൾ അവഗണിക്കുകയായിരുന്നു. ഇതേ തുടർന്നാണ് നടപടി സ്വീകരിച്ചത്. ഒടിടി പ്ലാറ്റ്ഫോമുകൾക്ക് പുറമേ 19 വെബ്സൈറ്റുകൾ, 10 ആപ്പുകൾ, 57 സാമൂഹ്യമാദ്ധ്യമ അക്കൗണ്ടുകൾ എന്നിവയ്ക്കെതിരെയും നടപടി സ്വീകരിച്ചിട്ടുണ്ട്.
ഐടി നിയമപ്രകാരമാണ് നടപടി. ഡ്രീം ഫിലിംസ്, വൂവി, സെയ്മ, അൺകട്ട് അട, ട്രി ഫ്ളിക്സ്, എക്സ് പ്രൈം, നിയോൺ എക്സ് വിഐപി, ബേഷ്റാംസ്, ഹണ്ടേഴ്സ്, റാബ്ബിറ്റ്, എക്സ്ട്രാമൂഡ്, ന്യൂഫ്ളിക്സ്, മൂഡ് എക്സ്, മോജ്ഫ്ളിക്സ്, ഹോട്ട് ഷോട്ട്സ്, വിഐപി, ഫുജി, ചിക്കൂഫ്ളിക്സ്, പ്രൈം പ്ലേയ് എന്നീ പ്ലാറ്റ്ഫോമുകളുടെ സംപ്രേഷണം ആണ് നിർത്തിവച്ചത്. സ്ത്രീകളുടെ അന്തസ്സിന് കോട്ടം വരുത്തുന്ന രീതിയിലുള്ള ഉള്ളടക്കങ്ങളാണ് പ്ലാറ്റ്ഫോമുകളിലൂടെ സംപ്രേക്ഷണം ചെയ്യുന്നത് എന്ന് കേന്ദ്രത്തിന്റെ വാർത്താക്കുറിപ്പിൽ പറയുന്നു.
ലൈംഗികതയും നഗ്നതയും ഔചിത്യമില്ലാത്ത തരത്തിൽ ഉപയോഗിച്ചുകൊണ്ടുള്ള ഉള്ളടക്കങ്ങളാണ് പ്ലാറ്റ്ഫോമുകൾ സംപ്രേഷണം ചെയ്യുന്നത്. ഇത് കുടുംബ ബന്ധങ്ങളെ ഉൾപ്പെടെ ബാധിക്കാൻ സാദ്ധ്യതയുണ്ട്. ഇതേ തുടർന്നാണ് സംപ്രേഷണം നിർത്തിവയ്ക്കാൻ തീരുമാനിച്ചത് എന്നും കുറിപ്പിൽ വ്യക്തമാക്കുന്നു.
