‘ഊഹക്കച്ചവടങ്ങൾ ഇനിയെങ്കിലും നിർത്തൂ’ ; ഇലക്ട്രോണിക് വോട്ടിംഗ് മെഷീന് എതിരായ ഹർജി തള്ളി സുപ്രീംകോടതി
ന്യൂഡൽഹി : ഇലക്ട്രോണിക് വോട്ടിംഗ് മെഷീന് എതിരായി നൽകിയ ഹർജി സുപ്രീംകോടതി തള്ളി. ഇവിഎംന്റെ പ്രവർത്തനവുമായി ബന്ധപ്പെട്ട നിരവധി ഹർജികൾ ഇതിനകം തന്നെ കോടതി കേട്ടു കഴിഞ്ഞു എന്ന് സുപ്രീംകോടതി നീരസം പ്രകടിപ്പിച്ചു. ജസ്റ്റിസ് സഞ്ജീവ് ഖന്ന, ജസ്റ്റിസ് ദീപാങ്കർ ദത്ത, ജസ്റ്റിസ് അഗസ്റ്റിൻ ജോർജ് മാസിഹ് എന്നിവർ അടങ്ങിയ ബെഞ്ച് ആണ് ഹർജി തള്ളിയത്.
ഇവിഎം മെഷീനുകളിൽ തകരാർ ഉണ്ടെന്ന് ചൂണ്ടിക്കാട്ടിയാണ് സുപ്രീംകോടതിയിൽ ഹർജി നൽകിയിരുന്നത്. ഇത്തരം ഹർജികൾ ഒരുപാട് കേട്ടുകഴിഞ്ഞു എന്നും അതിനുള്ള മറുപടി നൽകി കഴിഞ്ഞെന്നും ഇനിയും എത്ര ഹർജികൾ കേൾക്കേണ്ടി വരും എന്നും കോടതി ഹർജിക്കാരനോട് ചോദിച്ചു. ഊഹ കച്ചവടത്തിന്റെ പേരിൽ പ്രവർത്തിക്കരുതെന്നും ഇനിയെങ്കിലും ഇത് നിർത്തു എന്നും കോടതി ഹർജിക്കാരനോട് നീരസം പ്രകടിപ്പിച്ചു.
ബി ആർ എസ് നേതാവ് കെ കവിത സമർപ്പിച്ച ഹർജിയിൽ വാദം കേൾക്കുന്നതും സുപ്രീംകോടതി മാറ്റിവെച്ചു. മാർച്ച് 19 ലേക്ക് ആണ് കവിതയുടെ കേസ് മാറ്റിവെച്ചിട്ടുള്ളത്. ഡൽഹി മദ്യനയം സംബന്ധിച്ച കേസിൽ ഇഡി സമൻസിന് എതിരെയാണ് കെ കവിത ഹർജി നൽകിയിരുന്നത്.
