ഇതാണോ പ്രബുദ്ധ കേരളം? കേരള ജനതയോട് മാപ്പ് പറഞ്ഞ്‌ കലാ ജീവിതം അവസാനിപ്പിച്ച് പോകുന്നതാണ് നല്ലത്; സത്യഭാമയ്‌ക്കെതിരെ അരിത ബാബു

തൃശൂർ: കലാഭവൻ മണിയുടെ സഹോദരനും നർത്തകനുമായ ആർഎൽവി രാമകൃഷ്ണനെതിരെ ജാതി അധിക്ഷേപം നടത്തിയ കലാമണ്ഡലം സത്യഭാമയ്‌ക്കെതിരെ രൂക്ഷ വിമർശനവുമായി യൂത്ത് കോൺഗ്രസ് നേതാവ് അരിത ബാബു. ആർഎൽവി രാമകൃഷ്ണനെതിരെ അധിക്ഷേപ വർത്തമാനം നടത്തിയ സത്യഭാമയെ സ്ത്രീയെന്നു പോലും പരാമർശിക്കുന്നത് വർത്തമാന കേരളത്തിനു അപമാനമാണ്. ജാതിമത വ്യത്യാസങ്ങൾ ഇല്ലാതെ ജനങ്ങൾ മതിമറന്ന് ആനന്ദം കണ്ടെത്തി തീരുന്നത് കലാമേഖലയിലാണ്. ചെയ്ത തെറ്റ് മനസ്സിലാക്കി സത്യഭാമ കേരള ജനതയോട് മാപ്പ് പറഞ്ഞു കലാ ജീവിതം അവസാനിപ്പിച്ച് പോകുന്നത് ആണ് നല്ലതെന്നും അരിത തുറന്നടിച്ചു.

ഫേസ്ബുക്ക് പോസ്റ്റിന്റെ പൂർണ്ണരൂപം

ഇതാണോ പ്രബുദ്ധ കേരളം. ഇവരൊക്കെ ആണോ പ്രബുദ്ധ സമൂഹം. കേരളം ലജ്ജിച്ചു തലതാഴ്ത്തുകയാണ്.
പ്രശസ്ത കലാകാരൻ ശ്രീ. RLV രാമകൃഷ്ണനെതിരെ അധിക്ഷേപ വർത്തമാനം നടത്തിയ നിങ്ങളെ സ്ത്രീയെന്നു പോലും പരാമർശിക്കുന്നത് വർത്തമാന കേരളത്തിനു അപമാനമാണ്. സർവ്വമേഖലകളിലും കൊടികുത്തിവാഴുന്ന ജാതീയതക്കെതിരായ പരസ്യമായ പോരാട്ടത്തിലാണെന്ന് നാം അവകാശപ്പെടുമ്പോഴും ഇത്തരം നെറുകേടുകളും നമുക്കു ചുറ്റും താണ്ഡവമാടുന്നത് കണ്ടില്ലെന്ന് നടിക്കുവാൻ നമുക്കാവില്ല.”

”കാരണം ജാതിമത വ്യത്യാസങ്ങൾ ഇല്ലാതെ ജനങ്ങൾ മതിമറന്ന് ആനന്ദം കണ്ടെത്തി തീരുന്നത് കലാമേഖലയിലാണ്. അവിടെ വിഷത്തിന്റെ വിത്തുപാകുന്ന സത്യഭാമേ നിങ്ങൾ ഈ കലാലോകത്തിന് അപമാനമാണ്. ചെയ്ത തെറ്റ് മനസ്സിലാക്കി കേരള ജനതയോട് മാപ്പ് പറഞ്ഞു കലാ ജീവിതം അവസാനിപ്പിച്ച് പോകുന്നത് ആണ് നല്ലത് എന്ന് പറയാൻ ആഗ്രഹിക്കുന്നു. #With_you_RLV_Ramakrishnan. നിങ്ങളെ ഈ സമൂഹത്തിൽ അപമാനിക്കുന്നവരുടെ മുന്നിൽ വിട്ടു കളയാൻ മലയാളികൾക്ക് ആവില്ല കാരണം നിങ്ങൾ ഞങ്ങളുടെ പ്രിയപ്പെട്ട മണി ചേട്ടന്റെ അനുജൻ കൂടിയാണ്.”