ന്യൂയോർക്ക്: യുഎസിലെ ഇന്ത്യൻ വിദ്യാർത്ഥികൾ ഉൾപ്പെട്ട ദാരുണമായ സംഭവ വികാസങ്ങൾ ആവർത്തിക്കുന്ന സാഹചര്യത്തിൽ ഇന്ത്യൻ വിദ്യാർത്ഥികൾ ജാഗ്രത പാലിക്കണമെന്ന് ആവശ്യപ്പെട്ട് പെപ്സികോ മുൻ മേധാവിയും ഇന്ത്യൻ വംശജയും ആയ ഇന്ദിര നൂയി.
വിദ്യാർത്ഥികൾ താമസിക്കുന്നതോ യാത്ര ചെയ്യുന്നതോ ആയ നഗരത്തിലെ “സുരക്ഷിത മേഖലകളെ” കുറിച്ച് ബോധവാന്മാരായിരിക്കണമെന്നും നൂയി വിദ്യാർത്ഥികളോട് അഭ്യർത്ഥിച്ചു. “ദയവായി അപകടകരമായ മേഖലകൾ ഒഴിവാക്കുക . രാത്രി വൈകി ഒറ്റയ്ക്ക് പുറത്തിറങ്ങരുത് അല്ലെങ്കിൽ രാത്രി വളരെ വൈകി പുറത്തിറങ്ങുകയേ അരുത് ,” അവർ പറഞ്ഞു, കൂട്ടമായും സുഹൃത്തുക്കളുമായും പുറത്തുപോകാൻ നൂയി വിദ്യാർത്ഥികളെ ഉപദേശിച്ചു.
അമേരിക്ക വളരെ വലിയ ഒരു രാജ്യമാണ്, ഇവിടെ നിങ്ങൾക്ക് എല്ലാത്തരത്തിലുള്ള ആളുകളെയും കിട്ടും. അതിൽ പല തരത്തിലുള്ള തട്ടിപ്പുകാരെയും നിങ്ങൾക്ക് കാണാൻ സാധിക്കും. നിങ്ങളുടെ സുഹൃത്തുക്കളെ തിരഞ്ഞെടുക്കുന്നതിൽ നിങ്ങൾ വളരെയധികം ശ്രദ്ധ പുലർത്തുക. ആരെങ്കിലും നിങ്ങളെ ഫോൺ വിളിച്ച് വ്യക്തിപരമായ വിവരങ്ങൾ ആവശ്യപ്പെടുകയാണെങ്കിൽ കൊടുക്കാതിരിക്കുക” ഇന്ത്യൻ വിദ്യാർത്ഥികളോട് ഇന്ദിര നൂയി അപേക്ഷിച്ചു.
അതെ സമയം വിദ്യാർത്ഥികൾ സ്വയം നിയന്ത്രണം പാലിക്കണമെന്നും അവർ ആവശ്യപ്പെട്ടു. സാംസ്കാരികമായി വളരെയധികം മാറ്റങ്ങൾ നിങ്ങൾക്ക് കാണുവാൻ സാധിക്കും. അത് കൊണ്ട് തന്നെ പുതുതായി ലഭിച്ച സ്വാതന്ത്രത്തിൽ സ്വയം മറക്കാതിരിക്കുക. നിയമങ്ങൾ പാലിച്ചു കൊണ്ട് നിയമത്തിനുള്ളിൽ ജീവിക്കുക. അവർ ഇന്ത്യൻ വിദ്യാർത്ഥികളോട് ആവശ്യപ്പെട്ടു. കൂടാതെ അമേരിക്കയിൽ വിദ്യാഭ്യാസം വളരെ ചിലവേറിയതാണെന്നും ഇവിടെ പഠിച്ചു എന്നത് കൊണ്ട് ജോലി ലഭിക്കും എന്ന് ഒരു ഉറപ്പും ഇല്ലെന്നും വിദ്യാഭ്യാസമുള്ള വ്യക്തികൾക്ക് ഇന്ത്യയിൽ തന്നെ അനവധി സാദ്ധ്യതകൾ ഉണ്ടെന്നും അവർ വ്യക്തമാക്കി.
