തിരുവനന്തപുരം: ഇലക്‌ട്രോണിക് വോട്ടിംഗ് മെഷീൻ തട്ടിപ്പാണെന്ന് വ്യാജ വാർത്തകൾ പ്രചരിപ്പിച്ച സംഭവത്തിൽ യൂട്യൂബർ അറസ്റ്റിൽ. ‘വെനീസ് ടിവി എന്റർടെയ്‌മെന്റ്’ എന്ന യൂട്യൂബ് ചാനലിന്റെ ഉടമയാണ് അറസ്റ്റിലായത്. ആലപ്പുഴ സൗത്ത് പോലീസ് ആണ് ഇയാളെ അറസ്റ്റ് ചെയ്തത്.
ഇലക്‌ട്രോണിക് വോട്ടിംഗ് മെഷീനെതിരെ സുപ്രീം കോടതി ജഡ്ജിയുടെ പരാമർശം എന്ന രീതിയിൽ സുപ്രീം കോടതിയിെല അഭിഭാഷകന്റെ വീഡിയോ ആണ് യൂട്യൂബർ പ്രചരിപ്പിച്ചത്. പലരും ഈ വീഡിയോ ഷെയർ ചെയ്യുന്നതായും കണ്ടെത്തിയിട്ടുണ്ട്.
ലോക്‌സഭാ തിരഞ്ഞെടുപ്പ് ബാലറ്റ് പേപ്പറിലൂടെ നടത്തണമെന്ന് ക്യാമ്പയിൻ നടത്തി സമൂഹത്തിൽ സ്പർദ്ധയും വിദ്വേഷവും സംഘർഷവും ഉണ്ടാക്കുകയെന്ന ലക്ഷ്യത്തോടെ ചാനലിലൂടെ വീഡിയോ പോസ്റ്റ് ചെയ്തതിനും പ്രചരിപ്പിച്ചതിനും പൊതുജനങ്ങളെ തെറ്റിദ്ധരിപ്പിച്ചതിനുമാണ് അറസ്റ്റ്. അതേസമയം, ലോക്‌സഭാ തിരഞ്ഞെടുപ്പിന് മുന്നോടിയായി സമൂഹമാദ്ധ്യമങ്ങൾ നിരീക്ഷിക്കുന്നതിനായി രൂപീകരിച്ച സോഷ്യൽ മീഡിയ നിരീക്ഷണ സംഘങ്ങൾ പട്രോളിംഗ് ശക്തമാക്കിയിട്ടുണ്ട്.
