തിരുവനന്തപുരം : കുപ്രസിദ്ധ ഗുണ്ടാത്തലവൻ സതീഷ് സാവൻ അറസ്റ്റിലായി. നിരവധി കേസുകളിലെ പ്രതിയായ ഇയാളെ ഡെൻസാഫ് സംഘമാണ് സാഹസികമായി പിടികൂടിയത്. മൂന്ന് കൊലപാതക കേസുകൾ അടക്കം 90ലധികം കേസുകളിലെ പ്രതിയാണ് കല്ലമ്പലം സ്വദേശിയായ സതീഷ് സാവന്. വർക്കലയിൽ വച്ചാണ് ഇയാളെ പോലീസ് സംഘം പിടികൂടിയത്.
കഴിഞ്ഞ ഫെബ്രുവരി 21ന് തിരുവനന്തപുരം മെഡിക്കൽ കോളേജ് അത്യാഹിത വിഭാഗത്തിനുള്ളിൽ തോക്കുമായി പ്രവേശിച്ച് സുരക്ഷാ ജീവനക്കാരെ ഭീഷണിപ്പെടുത്തിയ ശേഷം കടന്നു കളഞ്ഞ സംഭവത്തെ തുടർന്നാണ് ഇയാൾക്കെതിരെ സംസ്ഥാന വ്യാപകമായി പോലീസ് വല വിരിച്ചിരുന്നത്. തിരുവനന്തപുരം അഴിയൂർ സ്റ്റേഷനിൽ മാത്രം ഇയാൾക്കെതിരെ 50ലധികം കേസുകൾ ഉണ്ട്. മൂന്ന് കൊലപാതക കേസും വധശ്രമം, മോഷണം, പിടിച്ചു പറി, മയക്കുമരുന്ന് വില്പന തുടങ്ങിയ കേസുകളും ഇയാൾക്കെതിരെയുണ്ട്.
വീടുകളിൽ കയറി തോക്ക് ചൂണ്ടി ഭീഷണിപ്പെടുത്തി സ്വർണ്ണവും പണവും കവരുന്നതാണ് സതീഷ് സാവന്റെ പ്രധാന രീതി. കൊല്ലം, ആലപ്പുഴ ജില്ലകളിലും ഇയാൾക്കെതിരെ കേസുകൾ ഉണ്ട്. വ്യാഴാഴ്ച വൈകുന്നേരം ഏഴരയോടെയാണ് തിരുവനന്തപുരം ജില്ല റൂറൽ ഡെൻസാഫ് സംഘം ഇയാളെ രഹസ്യ നീക്കത്തിലൂടെ പിടികൂടിയത്. തുടർന്ന് പ്രതിയെ കല്ലമ്പലം പോലീസിന് കൈമാറി.
Discussion about this post