തൃശ്ശൂർ: ചലച്ചിത്ര താരങ്ങളായ അപർണാ ദാസും ദീപക് പറമ്പോലും വിവാഹിതരായി. ഇന്ന് രാവിലെ ഗുരുവായൂർ ക്ഷേത്രത്തിൽവച്ചായിരുന്നു വിവാഹം. ഇരുവരുടെയും വിവാഹ ചിത്രങ്ങളും വീഡിയോകളും സമൂഹമാദ്ധ്യമങ്ങളിൽ വ്യാപകമായി പ്രചരിക്കുന്നുണ്ട്.
ലളിതമായ ചടങ്ങുകളോടെയായിരുന്നു വിവാഹം. ഇരു കൂട്ടരുടെയും അടുത്ത ബന്ധുക്കൾ മാത്രമാണ് വിവാഹ ചടങ്ങിൽ പങ്കെടുത്തത്. കവസ് സാരിയായിരുന്നു അപർണാ ദാസിന്റെ വിവാഹ വസ്ത്രം. കഴിഞ്ഞ ദിവസം അപർണ വിവാഹത്തോട് അനുബന്ധിച്ചുള്ള ഹൽദി ആഘോഷത്തിന്റെ ചിത്രങ്ങൾ സമൂഹമാദ്ധ്യമങ്ങളിൽ പങ്കുവച്ചിരുന്നു.
ഈ മാസം രണ്ടിനായിരുന്നു അപർണയും ദീപകും വിവാഹക്കാര്യം മാദ്ധ്യമങ്ങളെ അറിയിച്ചത്. വിവാഹത്തിന്റെ തിയതിയും ഇവർ പുറത്തുവിട്ടിരുന്നു. എന്നാൽ ഇതിന് ശേഷം മറ്റ് വിശേഷങ്ങൾ ഒന്നും തന്നെ ഇരുവരും സമൂഹമാദ്ധ്യമങ്ങളിൽ പങ്കുവച്ചിരുന്നില്ല. ഇതിനിടെയാണ് കഴിഞ്ഞ ദിവസം ഹൽദിയുടെ ചിത്രങ്ങൾ അപർണ പുറത്തുവിട്ടത്.
ഫഹദ് നായകനായ ഞാൻ പ്രകാശൻ എന്ന ചിത്രത്തിലൂടെയാണ് അപർണ അഭിനയ ലോകത്തേക്ക് കടന്നുവന്നത്. മലർവാടി ആർട്‌സ് ക്ലബ്ബാണ് ദീപകിന്റെ ആദ്യ ചിത്രം. തട്ടത്തിൻ മറയത്ത്, തിര, കുഞ്ഞിരാമായണം, കണ്ണൂർ സ്‌ക്വാഡ്, മഞ്ഞുമ്മൽ ബോയ്സ് എന്നിങ്ങനെ നിരവധി ചിത്രത്തിൽ അഭിനയിച്ചു. ‘വർഷങ്ങൾക്ക് ശേഷം’ ആണ് ഏറ്റവും ഒടുവിലായി ഇറങ്ങിയ ചിത്രം.
Discussion about this post