തിരുവനന്തപുരം : തിരുവനന്തപുരം മേയർ ആര്യ രാജേന്ദ്രൻ കെഎസ്ആർടിസി ബസ് തടഞ്ഞ് സംഘർഷം ഉണ്ടായ സംഭവത്തിൽ മേയർക്ക് പിന്തുണയുമായി ഡിവൈഎഫ്ഐ. മേയർ ആര്യ രാജേന്ദ്രനെതിരെ നടക്കുന്നത് ആസൂത്രിത നീക്കം ആണെന്ന് ഡിവൈഎഫ്ഐ സംസ്ഥാന സെക്രട്ടറി വികെ സനോജ് അഭിപ്രായപ്പെട്ടു. മോശമായി പെരുമാറിയത് കെഎസ്ആർടിസി ഡ്രൈവറാണ്. ആര്യ ഒരു തെറ്റും ചെയ്തിട്ടില്ല. ആര്യക്കെതിരായി നടക്കുന്ന ആക്രമണം ഡിവൈഎഫ്ഐ ശക്തമായി കൈകാര്യം ചെയ്യും എന്നും വികെ സനോജ് സൂചിപ്പിച്ചു.
ആര്യയുടേത് ശരിയായ പ്രതികരണം ആയിരുന്നു. ലൈംഗിക അധിക്ഷേപം ഉണ്ടായാൽ ചോദ്യം ചെയ്യുക തന്നെയാണ് വേണ്ടത്. ആര്യ പ്രതികരിച്ച രീതിയിൽ തന്നെയാണ് പെൺകുട്ടികൾ പ്രതികരിക്കേണ്ടത്. തെമ്മാടികളെ ഇങ്ങനെ തന്നെയാണ് നേരിടേണ്ടത്. എന്നാൽ ആര്യക്കെതിരായി ഹീനമായ ആക്രമണങ്ങളാണ് നടക്കുന്നത് എന്നും വികെ സനോജ് അഭിപ്രായപ്പെട്ടു.
മറ്റേതെങ്കിലും പെൺകുട്ടിയായിരുന്നു ഇത്തരത്തിൽ പ്രതികരിച്ചിരുന്നതെങ്കിൽ വീര വനിത ആകുമായിരുന്നു. എന്നാൽ ആര്യയെ എല്ലാവരും ആക്രമിക്കുകയാണ് ചെയ്യുന്നത്.
സൈബർ ഇടത്തിൽ സംഘടിതമായ ആക്രമണമാണ് ആര്യക്കെതിരെ നടക്കുന്നത്. ഇതിനെതിരെ പൊതുസമൂഹം പ്രതികരിക്കണം എന്നും ഡിവൈഎഫ്ഐ സംസ്ഥാന സെക്രട്ടറി ആവശ്യപ്പെട്ടു.
Discussion about this post