ലഖ്‌നൗ : ലോക്സഭാ തിരഞ്ഞെടുപ്പിൽ വാരണാസിയിൽ നിന്നും മത്സരിക്കുമെന്ന് മിമിക്രി-ഹാസ്യതാരം ശ്യാം രംഗീല. പ്രധാനമന്ത്രി നരേന്ദ്രമോദിക്ക് എതിരായിട്ടായിരിക്കും മത്സരിക്കുക. സ്വതന്ത്ര സ്ഥാനാർത്ഥിയായിട്ടാണ് ശ്യാം രംഗീല വാരാണസിയിൽ മത്സരിക്കുന്നത്. നരേന്ദ്രമോദിയെ അനുകരിച്ചുകൊണ്ട് ശ്രദ്ധേയനായ വ്യക്തിയാണ് ശ്യാം രംഗീല.
വാരണാസിയിൽ മോദിക്ക് ഒരു എതിർ സ്ഥാനാർത്ഥി ആവശ്യമാണ്. കോൺഗ്രസ് സ്ഥാനാർത്ഥികൾ എപ്പോഴാണ് പത്രിക പിൻവലിക്കുക എന്ന് പറയാൻ കഴിയില്ല. സൂറത്തിലും ഇൻഡോറിലും അത്തരത്തിലുള്ള സംഭവങ്ങൾ ഉണ്ടായിട്ടുണ്ട്. അങ്ങനെ വാരണാസിയിലും സംഭവിച്ചാൽ മോദിക്ക് എതിരാളി ഇല്ലാതായി പോകും. അങ്ങനെയൊരു സാഹചര്യം ഉണ്ടായാൽ മോദിക്ക് ശക്തനായ എതിരാളി ആകാൻ ആയാണ് താൻ മത്സരിക്കുന്നത് എന്ന് ശ്യാം രംഗീല വ്യക്തമാക്കി.
പ്രധാനമന്ത്രി നരേന്ദ്രമോദിയെ അനുകരിച്ചുകൊണ്ടും രാഹുൽ ഗാന്ധിക്കും അരവിന്ദ് കെജ്രിവാളിനും എതിരായി വീഡിയോകൾ ചെയ്തുകൊണ്ടുമാണ് ശ്യാം രംഗീല ഹാസ്യരംഗത്ത് ശ്രദ്ധേയനാകുന്നത്. ഏപ്രിൽ 25 ന് വാരണാസിയിൽ നിന്ന് സ്വതന്ത്ര സ്ഥാനാർത്ഥിയായി നാമനിർദ്ദേശ പത്രിക സമർപ്പിക്കുമെന്നും ശ്യാം രംഗീല വ്യക്തമാക്കി.
