ന്യൂഡൽഹി : പുനരുപയോഗ ഊർജത്തിന്റെ ഉപയോഗത്തിലൂടെ ഉദാത്തമായ മാതൃക സൃഷ്ടിക്കാൻ ഒരുങ്ങുകയാണ് എൻസിആർടിസി. ഡൽഹി-ഗാസിയാബാദ്-മീററ്റ് ആർആർടിഎസ് ഇടനാഴി ഇനി സൗരോർജത്തിൽ പ്രവർത്തിക്കുന്നതാണ്. മേൽക്കൂരകളിൽ സോളാർ പാനലുകൾ സ്ഥാപിച്ച് എൻസിആർടിസി സ്റ്റേഷനുകൾ, ഡിപ്പോകൾ, റിസീവിംഗ് സബ്സ്റ്റേഷനുകൾ എന്നിവയിലേക്കായി സുസ്ഥിരമായ ഊർജ്ജമാണ് എൻസിആർടിസി സൃഷ്ടിക്കുന്നത്.
ഡൽഹി-ഗാസിയാബാദ്-മീററ്റ് ആർആർടിഎസ് ഇടനാഴിയിൽ ഉടനീളമായി സ്ഥാപിക്കുന്ന സോളാർ മേൽക്കൂരകളിലൂടെ 2.21 മെഗാവാട്ട് പീക്ക് ഇൻ-ഹൗസ് സോളാർ പവർ ഉൽപ്പാദനമാണ് എൻസിഇആർടിസി ലക്ഷ്യമിടുന്നത്. ഇത്തരത്തിൽ പുനരുപയോഗ ഊർജ്ജത്തിന്റെ ഉപയോഗം വഴി പ്രതിവർഷം 2300 ടൺ കാർബൺ ഡൈ ഓക്സൈഡ് ഉദ്വമനം തടയാൻ കഴിയുന്നതാണ്.
നിലവിൽ ഗുൽധാർ, സാഹിബാബാദ് RRTS സ്റ്റേഷനുകളിലാണ് സൗരോർജ പദ്ധതി പൂർണമായും നടപ്പിലാക്കിയിട്ടുള്ളത്. ഇവ ഓരോന്നിനും 729 കിലോവാട്ട് ശേഷിയാണ് ഉള്ളത്. വൈകാതെ തന്നെ മറ്റു സ്റ്റേഷനുകളിലും സോളാർ മേൽക്കൂര സ്ഥാപിക്കുന്നത് പൂർണ്ണമാകുന്നതാണ്. 11 മെഗാവാട്ട് സോളാർ പവർ കപ്പാസിറ്റി ആണ് നിലവിൽ എൻസിആർടിസി ലക്ഷ്യമിടുന്നത്. ഈ ലക്ഷ്യം പൂർത്തിയാകുന്നതോടെ പ്രതിവർഷം ഏകദേശം 11,500 ടൺ CO2 ഉദ്വമനം തടയാൻ കഴിയുന്നതായിരിക്കും.
Discussion about this post