ന്യൂഡൽഹി : ആഗോള സമാധാന പ്രവർത്തനങ്ങൾക്കായി യുണൈറ്റഡ് നാഷൻസിന്റെ ഭാഗമായി പ്രവർത്തിച്ച ഇന്ത്യൻ സൈനിക മേജർ രാധിക സെന്നിന് യുഎന്നിന്റെ ആദരവ്. യു എൻ സമാധാന സേനാംഗങ്ങളുടെ അന്താരാഷ്ട്ര ദിനമായ മെയ് 30ന് യു എൻ സെക്രട്ടറി ജനറൽ അന്റോണിയോ ഗുട്ടെറസ് മേജർ രാധിക സെന്നിന് പുരസ്കാരം സമർപ്പിക്കും. 2023 മുതൽ 2024 വരെയുള്ള കാലയളവിൽ ഡെമോക്രാറ്റിക് റിപ്പബ്ലിക് ഓഫ് കോംഗോയിൽ യുഎൻ ഓർഗനൈസേഷൻ സ്റ്റെബിലൈസേഷൻ മിഷനിൽ സേവനമനുഷ്ഠിച്ചതിലൂടെയാണ് മേജർ രാധിക സെൻ യു എൻ ആദരവിന് അർഹയായിരിക്കുന്നത്.
2019ൽ സൗത്ത് സുഡാനിലെ യുഎൻ മിഷനിൽ (UNMISS) സേവനമനുഷ്ഠിച്ചിരുന്ന മേജർ സുമൻ ഗവാനിക്ക് ശേഷം ഈ അഭിമാനകരമായ പുരസ്കാരം ലഭിക്കുന്ന രണ്ടാമത്തെ ഇന്ത്യൻ സമാധാന സേനാംഗമാണ് മേജർ രാധിക സെൻ. എട്ട് വർഷം മുമ്പാണ് മേജർ രാധിക സെൻ ഇന്ത്യൻ സൈന്യത്തിൽ ചേർന്നത്. ബയോടെക്‌നോളജി എഞ്ചിനീയറിംഗിൽ ബിരുദവും ബോംബെ ഐഐടിയിൽ ബിരുദാനന്തര ബിരുദവും ശേഷമാണ് രാധിക സെൻ സായുധ സേനയിൽ ചേർന്നത്.
ഇന്ത്യൻ റാപ്പിഡ് ഡിപ്ലോയ്‌മെൻ്റ് ബറ്റാലിയനുമായുള്ള എൻഗേജ്‌മെൻ്റ് പ്ലാറ്റൂൺ കമാൻഡറായി സെൻ 2023ലാണ് മോനുസ്‌കോയിലേക്ക് വിന്യസിക്കപ്പെട്ടത്. ഡിആർസിയുടെ വെല്ലുവിളി നിറഞ്ഞ അന്തരീക്ഷത്തിൽ പ്രവർത്തിക്കുന്ന എല്ലാ സമാധാന സേനാംഗങ്ങളുടെയും കഠിനാധ്വാനത്തിനുള്ള അംഗീകാരമാണ് ഈ പുരസ്കാരം നേട്ടമെന്ന് മേജർ രാധിക സെൻ വ്യക്തമാക്കി.
