ന്യൂഡൽഹി: സർക്കാർ രൂപീകരണത്തിന് മുന്നോടിയായി ബിജെപിയുടെ മുതിർന്ന നേതാക്കളെ കണ്ട് പ്രധാനമന്ത്രി നരേന്ദ്ര മോദി. ഭാരത് രത്ന ജേതാവും ബിജെപിയുടെ സ്ഥാപക നേതാവുമായ എൽ.കെ അദ്വാനി, മുതിർന്ന നേതാവും മുൻ കേന്ദ്രമന്ത്രിയുമായ മുരളി മനോഹർ ജോഷി എന്നിവരുമായാണ് അദ്ദേഹം കൂടിക്കാഴ്ച നടത്തിയത്. ഇരു നേതാക്കളിൽ നിന്നും പ്രധാനമന്ത്രി അനുഗ്രഹം വാങ്ങി.
ഇന്ന് വൈകീട്ടോടെയാണ് പ്രധാനമന്ത്രിയുടെ നേതൃത്വത്തിൽ എൻഡിഎ നേതാക്കൾ രാഷ്ട്രപതിയെ കണ്ട് സർക്കാർ രൂപീകരിക്കുന്നതിനുള്ള അവകാശവാദം ഉന്നയിക്കുക. ഇതിന് മുന്നോടിയായി രാവിലെ എൻഡിഎ യോഗം ചേർന്നിരുന്നു. ഇതിന് പിന്നാലെയാണ് എൽകെ അദ്വാനിയെയും മുരളി മനോഹർ ജോഷിയെയും നരേന്ദ്ര മോദി വസതിയിൽ എത്തി കണ്ടത്. എൽകെ അദ്വാനിയുടെ വസതിയിൽ ആയിരുന്നു മോദി ആദ്യം എത്തിയത്. ഇതിന് പിന്നാലെ മുരളി മനോഹർ ജോഷിയെയും കാണുകയായിരുന്നു.
വൈകീട്ടോടെ പ്രധാനമന്ത്രി എൻഡിഎ നേതാക്കളുമായി രാഷ്ട്രപതി ഭവനിൽ എത്തും. സർക്കാർ രൂപീകരണത്തിന് ദ്രൗപതി മുർമു അനുവാദം നൽകുന്ന മുറയ്ക്ക് സഖ്യം തുടർ നീക്കങ്ങളിലേക്ക് കടക്കും. ഞായറാഴ്ചയാണ് നരേന്ദ്ര മോദിയുടെ നേതൃത്വത്തിൽ മൂന്നാം എൻഡിഎ സർക്കാർ അധികാരത്തിലേറുക. വൈകീട്ട് ആറ് മണിയോടെയാകും പ്രധാനമന്ത്രിയായുള്ള മോദിയുടെ സത്യപ്രതിജ്ഞ. ഇതിന് ശേഷം മന്ത്രിസഭയിലെ മറ്റ് അംഗങ്ങളും സത്യപ്രതിജ്ഞ ചെയ്ത് അധികാരമേൽക്കും.
Discussion about this post