ന്യൂഡൽഹി: ട്വന്റി 20 ലോകകപ്പിൽ ഇന്ത്യയോട് തോറ്റ പാകിസ്താനെ ട്രോളി ഡൽഹി പോലീസിന്റെ ട്വീറ്റ്. ഞങ്ങൾ രണ്ട് വലിയ ശബ്ദങ്ങൾ കേട്ടു, ഒന്ന് ഇന്ത്യ… ഇന്ത്യ രണ്ട് ടിവി പൊട്ടിത്തകരുന്നത്. എന്തായിരുന്നു അതെന്ന് ഒന്ന് പരിശോധിച്ച് പറയാമോ എന്നായിരുന്നു ഡൽഹി പോലീസിന്റെ ട്വീറ്റ്. നിമിഷ നേരങ്ങൾ കൊണ്ടാണ് ട്വീറ്റ് വൈറലായത്. മണിക്കീറുകൾക്കുള്ളിൽ പോസ്റ്റ് 30,000 ത്തിലധികം ഉപയോക്താക്കൾ ലൈക്ക് ചെയ്യുകയും 5,500 ലധികം റീട്വീറ്റ് ചെയ്യപ്പെടുകയുമുണ്ടായി.
മത്സരത്തിൽ ആദ്യം ബാറ്റ് ചെയ്ത ഇന്ത്യ 19 ഓവറിൽ 119 റൺസിൽ ഓൾ ഔട്ടായി. പാകിസ്താന്റെ മറുപടി 20 ഓവറിൽ ഏഴിന് 113 റൺസിലേക്കേ എത്തിയുള്ളു. ഇതോടെ രണ്ടാം മത്സരവും പരാജയപ്പെട്ട പാകിസ്താന്റെ സൂപ്പർ എട്ട് സാധ്യതകൾ പരുങ്ങലിലായിരിക്കുകയാണ്. രണ്ട് മത്സരങ്ങളും ജയിച്ച ഇന്ത്യ ഗ്രൂപ്പ് എയിൽ ഒന്നാമതെത്തി.
