തിരുവനന്തപുരം : കേരളത്തെ വിദേശരാജ്യങ്ങൾക്കു മുൻപിൽ ബ്രാൻഡ് ചെയ്യുമെന്ന് മുഖ്യമന്ത്രി പിണറായി വിജയൻ. ലോക കേരളസഭാ സമ്മേളനത്തിന്റെ അവസാന ദിവസത്തെ മറുപടി പ്രസംഗത്തിൽ ആയിരുന്നു മുഖ്യമന്ത്രി ഇക്കാര്യം വ്യക്തമാക്കിയത്. കേരളത്തിന്റെ തനത് കലകളും സംസ്കാരവും വിദേശരാജ്യങ്ങളിൽ പ്രദർശിപ്പിക്കുന്നതാണ് പദ്ധതി.
ബ്രാൻഡിങ്ങിന്റെ ഭാഗമായി കേരള കലാമണ്ഡലത്തിന്റെ നേതൃത്വത്തിൽ വിവിധ കലകളെ കോർത്തിണക്കിയുള്ള ഷോകൾ വിവിധ വിദേശ രാജ്യങ്ങളിൽ സംഘടിപ്പിക്കും. അഞ്ചുദിവസം വരെ നീണ്ടുനിൽക്കുന്ന അവതരണ ഉത്സവങ്ങളും ശില്പശാലകളും സെമിനാറുകളും സംഘടിപ്പിക്കുന്നതിനായി കലാമണ്ഡലം പ്രത്യേക പദ്ധതി തയ്യാറാക്കിയിട്ടുണ്ട്. ഇതിന്റെ ഭാഗമായി ആദ്യ ഷോ അമേരിക്കയിൽ സംഘടിപ്പിക്കും എന്നും പിണറായി വിജയൻ വ്യക്തമാക്കി.
ലോകത്താകമാനം കുടിയേറ്റവും പ്രവാസവും ശക്തമായി കൊണ്ടിരിക്കുകയാണ്. കേരളത്തിൽ നിന്നുള്ള കുടിയേറ്റവും വർധിക്കാനാണ് സാധ്യത. ലോകത്തിന്റെ വിവിധ ഭാഗങ്ങളിൽ ചിതറിക്കിടക്കുന്ന സമൂഹം ഭാഷയെയും സംസ്കാരത്തെയും സംരക്ഷിക്കുന്നതിനായി കേരളീയർ തമ്മിലുള്ള കൂട്ടായ്മകൾ വലിയ തോതിൽ ശക്തിപ്പെടുത്തണം. പരസ്പരം മത്സരിച്ച് തൊഴിൽ ചൂഷണത്തെ സഹായിക്കുന്നതിന് പകരം കുടിയേറ്റ തൊഴിലാളികളുടെ കൂടുതൽ ന്യായമായ സമീപനം സ്വീകരിക്കാൻ ഒരുമിച്ച് ആവശ്യപ്പെടണം. ഇക്കാര്യത്തിനായി കേന്ദ്രസർക്കാരും മുൻകൈ എടുക്കണം എന്നും പിണറായി വിജയൻ ലോക കേരളസഭാ സമാപന സമ്മേളനത്തിൽ വ്യക്തമാക്കി.
