ന്യൂഡൽഹി: ലോകബാങ്കിന്റെ ആഗോള കണ്ടെയ്നർ തുറമുഖ നിലവാര ഇൻഡക്സിൽ ഇന്ത്യയിൽ നിന്നും ഇടം പിടിച്ച 9 തുറമുഖങ്ങളിൽ 4 എണ്ണവും അദാനി ഗ്രൂപ്പിന്റേത്. 100 തുറമുഖങ്ങൾ ഉൾപ്പെടുന്ന പട്ടികയിൽ ഇരുപത്തിയേഴാം സ്ഥാനത്ത് മുന്ദ്ര തുറമുഖവും അൻപത്തിയേഴാം സ്ഥാനത്ത് കാട്ടുപള്ളി തുറമുഖവും അറുപത്തിയെട്ടാം സ്ഥാനത്ത് ഹാസിറ തുറമുഖവും എഴുപത്തിയൊന്നാം സ്ഥാനത്ത് കൃഷ്ണപട്ടണം തുറമുഖവുമാണ് ഉൾപ്പെട്ടിരിക്കുന്നത്.
ഉത്പാദനം, കാര്യക്ഷമത, വിശ്വാസ്യത തുടങ്ങി നിരവധി മാനദണ്ഡങ്ങളെ അടിസ്ഥാനപ്പെടുത്തിയാണ് ലോക ബാങ്ക് മികച്ച തുറമുഖങ്ങളുടെ പട്ടിക തയ്യാറാക്കുന്നത്. വാണിജ്യപ്രമുഖരും ദേശീയ സർക്കാരുകളും തുറമുഖ അതോറിറ്റികളും വികസന ഏജൻസികളും അന്താരാഷ്ട്ര സംഘടനകളും സ്വകാര്യ ഓപ്പറേറ്റർമാരും ഈ പട്ടികയെ ആധാരമാക്കിയാണ് വൻകിട വ്യാപാര പദ്ധതികൾ തയ്യാറാക്കുന്നത്.
സാങ്കേതിക വിദ്യകളുടെ ശരിയായ ഉപയോഗവും ഉന്നത ഗുണനിലവാരത്തിൽ വിട്ടുവീഴ്ചയില്ലാത്ത സമീപനവുമാണ് തങ്ങളെ ഈ നേട്ടത്തിന് അർഹരാക്കിയതെന്ന് അദാനി ഗ്രൂപ്പ് പ്രതികരിച്ചു. ആഗോള തുറമുഖ വ്യവസായ രംഗത്ത് കാര്യക്ഷമതയും ഉത്പാദനക്ഷമതയും വർദ്ധിപ്പിക്കാൻ തങ്ങൾ ഇനിയും പരിശ്രമിക്കുമെന്നും കമ്പനി അറിയിച്ചു
