എറണാകുളം : എറണാകുളം നേര്യമംഗലത്ത് പെട്രോളുമായി പോയിരുന്ന ടാങ്കർ ലോറിക്ക് തീപിടിച്ചു. കൊച്ചി-ധനുഷ്കോടി ദേശീയപാതയിലാണ് അപകടം നടന്നത്. നേര്യമംഗലം വില്ലാഞ്ചിറയിൽ വച്ചാണ് ടാങ്കർ ലോറിയിൽ തീ പടർന്നത്. 4000 ലിറ്റർ പെട്രോളും 8000 ലിറ്റർ ഡീസലും ആയിരുന്നു ടാങ്കറിൽ ഉണ്ടായിരുന്നത്.
എറണാകുളത്തു നിന്നും മൂന്നാറിലേക്ക് പോവുകയായിരുന്നു ടാങ്കർ ലോറി. വില്ലാഞ്ചിറയിലെ നീലാംബരി ബാറിന് മുൻപിൽ വച്ചാണ് ഡ്രൈവറുടെ ക്യാബിന്റെ താഴെ എൻജിൻ ഭാഗത്തു നിന്നും തീ പടർന്നത്. തീ പടർന്ന ഉടനെ വാഹനത്തിന്റെ എൻജിൻ ഓഫ് ആയി. വാഹനത്തിന്റെ ഡ്രൈവറുടെ സമയോചിതമായ ഇടപെടൽ മൂലം സമീപത്തുണ്ടായിരുന്ന നാട്ടുകാരുടെ കൂടി സഹായത്തോടെ തീ അണക്കാൻ കഴിഞ്ഞതിനാൽ വൻ ദുരന്തം ഒഴിവായി.
സംഭവം അറിഞ്ഞ് കോതമംഗലം ഫയർഫോഴ്സ് ടീമും ഊന്നുകൽ പോലീസും ഉടൻതന്നെ സ്ഥലത്തെത്തി. ദേശീയപാതയിൽ തിരക്കേറിയ സമയത്ത് ആയിരുന്നു പെട്രോൾ ടാങ്കർ ലോറിയിൽ തീപിടുത്തം ഉണ്ടായത്. ഫയർഫോഴ്സ് നടത്തിയ പരിശോധനയിൽ ഷോർട്ട് സർക്യൂട്ട് ആണ് തീ പിടിക്കാൻ കാരണമെന്നാണ് കണ്ടെത്തിയിട്ടുള്ളത്.
