മഴക്കാലത്ത് മഴയ്ക്കൊപ്പം എത്തുന്ന വിരുന്നുകാരാണ് കൊതുകുകൾ. ഇത്തിരിക്കുഞ്ഞന്മാരായ ഇവർ നമുക്കുണ്ടാക്കുന്ന തലവേദനയാകട്ടെ വലുതും. ജീവൻ വരെ അപകടത്തിലാക്കുന്ന ഇത്തരം കൊതുകുകളെ തുരത്താൻ പല വഴികളും പ്രയോഗിച്ച് പരാജയപ്പെട്ടവരാകും ഭൂരിഭാഗവും. എന്നാൽ ഈ ചെടികൾ വീട്ടിൽ നട്ടുവളർത്തികൊണ്ട് കൊതുകുകളെ വീട്ടിൽ നിന്നും അകറ്റി നിർത്താം.
കൊതുകുകളെ തുരത്താൻ വീടുകളിൽ തുളസി ചെടി നട്ടുവളർത്തുന്നത് നന്നായിരിക്കും. വീടിന് മുൻപിലോ പരിസരത്തോ ബാൽക്കണിയിലോ തുളസി നട്ടുവളർത്താം. പരിസ്ഥിതിയെ ശുദ്ധീകരിക്കുന്ന ചെടിയാണ് തുളസി. ഇതിന്റെ സുഗന്ധമാണ് കൊതുകുകളെ വീടിന്റെ പരിസരത്ത് നിന്നും അകറ്റി നിർത്തുന്നത്.
കൊതുകുകളെ അകറ്റി നിർത്താൻ വളർത്താവുന്ന മറ്റൊരു ചെടിയാണ് ലെമൻ ഗ്രാസ്. ശക്തമായ സുഗന്ധം പുറപ്പെടുവിക്കുന്ന സസ്യമാണ് ഇത്. അതിനാൽ ഇതിന്റെ ഗന്ധം കൊതുകുകളെ അകറ്റുന്നു. വീടിന്റെ പരിസരത്ത് ഈ ചെടികൾ നട്ടുവളർത്താം.
ഭൂരിഭാഗം വീടുകളുടെയും പൂന്തോട്ടത്തിൽ സ്ഥാനം പിടിച്ചിട്ടുള്ള പൂവാണ് ജമന്തി. പൂന്തോട്ടത്തിന് അഴക് വർദ്ധിപ്പിക്കാൻ മാത്രമല്ല കൊതുകുകളെ അകറ്റി നിർത്താനും ഈ ചെടികൾ ഗുണം ചെയ്യും. പൈറെത്രം, സാപ്പോണിൻ, സ്കോപോളിറ്റിൻ എന്നിവ ജമന്തിയിൽ അടങ്ങിയിട്ടുണ്ട്. ഇതാണ് കൊതുകുകളെ പ്രതിരോധിക്കുന്നത്.
ഔഷധഗുണം കൊണ്ട് പേര് കേട്ട സസ്യമാണ് ആര്യവേപ്പ്. കൊതുകുകടിയിൽ നിന്നും സംരക്ഷണം നേടാൻ ആര്യവേപ്പ് ഇല ഉപയോഗിക്കാം. ആര്യ വേപ്പിന്റെ കയ്പ്പാണ് കൊതുകുകളെ തുരത്തുന്നത്. ആര്യവേപ്പിന്റെ നീര് വരാന്തയിൽ തളിക്കുന്നത് ഈച്ച പോലുള്ള ചെറുപ്രാണികളെ അകറ്റി നിർത്തും. ആര്യ വേപ്പ് നീര് ശരീരത്തിൽ തേച്ചാൽ കൊതുക് കടിയ്ക്കുകയില്ല.
ലാവെൻഡർ പ്ലാന്റ് നടുന്നതും കൊതുകുകളെ പ്രതിരോധിക്കുന്നതിനുള്ള ഉപാധിയാണ്. ലാവെൻഡറിന്റെയും ഗന്ധമാണ് കൊതുകുകളെ അകറ്റുന്നത് ലാവന്റർ ഓയിൽ ശരീരത്തിൽ പുരട്ടിയാൻ മനുഷ്യ ഗന്ധം തിരിച്ചറിയാൻ കൊതുകുകൾക്ക് കഴിയില്ല.
