മലപ്പുറം : മലപ്പുറത്തെ മലയോര പ്രദേശമായ കരുവാരക്കുണ്ടിൽ വൻ മലവെള്ളപ്പാച്ചിൽ. കനത്ത മഴയ്ക്ക് പിന്നാലെയാണ് വലിയ രീതിയിലുള്ള മലവെള്ളപ്പാച്ചിൽ ഉണ്ടായത്. കരുവാരക്കുണ്ടിലെ വിവിധ പുഴകൾ കരകവിഞ്ഞൊഴുകി. ഒലിപ്പുഴ, കല്ലൻ പുഴ എന്നിവിടങ്ങളിലും സമീപപ്രദേശങ്ങളിലെ തോടുകളിലും ആണ് വലിയ രീതിയിലുള്ള മലവെള്ളപ്പാച്ചിൽ ഉണ്ടാകുന്നത്.
മലപ്പുറം, പാലക്കാട് ജില്ലകളിൽ കഴിഞ്ഞദിവസം കേന്ദ്ര കാലാവസ്ഥ വകുപ്പ് ഓറഞ്ച് അലർട്ട് പ്രഖ്യാപിച്ചിരുന്നു. അതിശക്തമായ മഴയ്ക്ക് സാധ്യതയുള്ളതായി മുന്നറിയിപ്പ് നൽകിയിട്ടുണ്ട്. മലപ്പുറത്തെ മലയോര മേഖലകളിലാണ് മഴ ലഭിക്കുന്നത്. കരുവാരക്കുണ്ട് മേഖലയിൽ ഇന്ന് ശക്തമായ മഴയാണ് ലഭിച്ചത്.
ഓഗസ്റ്റ് 13 വരെ കേരളത്തിലെ വിവിധ ജില്ലകളിൽ ശക്തമായ മഴയ്ക്ക് സാധ്യതയുള്ളതായി കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകിയിട്ടുണ്ട്. ഇടിമിന്നലോട് കൂടിയ മഴയാണ് പ്രവചിച്ചിട്ടുള്ളത്. ഈ ദിവസങ്ങളിൽ കേരള തീരത്ത് മത്സ്യബന്ധനത്തിനും വിലക്കുണ്ട്. മഴയോടൊപ്പം ഉരുൾപൊട്ടൽ, മണ്ണിടിച്ചിൽ, വെള്ളപ്പൊക്കം എന്നിവയെ കരുതിയിരിക്കണം എന്നും കാലാവസ്ഥാ നിരീക്ഷണ കേന്ദ്രം അറിയിച്ചു.
