തിരുവനന്തപുരം: പരീക്ഷ പാസായി റാങ്ക് പട്ടികയിൽ ഇടംപിടിച്ചിട്ടും വിജിലൻസ് വിഭാഗത്തിലേക്ക് ഡെപ്യൂട്ടേഷൻ നിയമനം നൽകാത്തതിൽ പോലീസ് സേനയ്ക്കുള്ളിൽ അമർഷവും അതൃപ്തിയും പുകയുന്നു. സംസ്ഥാനമൊട്ടാകെ എ.എസ്.ഐ, സീനിയർ സിവിൽ പോലീസ് ഓഫീസർ, സിവിൽ പോലീസ് ഓഫീസർ തസ്തികകളിൽ ലോക്കൽ പോലീസിൽ ജോലിചെയ്യുന്ന 600-ഓളം ഉദ്യോഗസ്ഥരാണ് മാസങ്ങളായി നിയമനം കാത്ത് കഴിയുന്നത്. എന്നാൽ, അർഹരായവരെ തളളിപ്പറഞ്ഞ് വിജിലൻസിൽ അഞ്ചുവർഷത്തെ സേവന കാലാവധി പൂർത്തിയാക്കിയവരെത്തന്നെ തുടരാൻ അനുവദിക്കുന്ന നീക്കമാണ് വലിയ പ്രതിഷേധങ്ങൾക്ക് വഴിവെച്ചിരിക്കുന്നത്.
2002-ൽ സംസ്ഥാന സർക്കാർ വിജിലൻസ് മാനുവൽ പരിഷ്കരിച്ചതോടെയാണ് സിവിൽ പോലീസ് ഓഫീസർ മുതൽ ഇൻസ്പെക്ടർ വരെയുള്ള ഉദ്യോഗസ്ഥരുടെ വിജിലൻസിലെ ഡെപ്യൂട്ടേഷൻ കാലാവധി മൂന്ന് മുതൽ അഞ്ച് വർഷം വരെയായി നിജപ്പെടുത്തിയത്. അതിനുമുൻപ് കൃത്യമായ കാലാവധി നിശ്ചയിച്ചിരുന്നില്ല. എന്നാൽ, പുതിയ ആൾക്കാരെ നിയമിക്കാതെ വിജിലൻസ് മാനുവൽ പരിഷ്കരണത്തിന് മുൻപുള്ള പഴയ രീതിയിലേക്ക് കാര്യങ്ങൾ തിരിച്ചെത്തിക്കാൻ സേനയിലെ ഒരുവിഭാഗം ഉന്നത ഉദ്യോഗസ്ഥർ നീക്കം നടത്തുന്നതായാണ് ആക്ഷേപം ഉയരുന്നത്.
മികച്ച സേവന പാരമ്പര്യമുള്ള ഉദ്യോഗസ്ഥരെ തെരഞ്ഞെടുക്കാൻ കടുത്ത മത്സര പരീക്ഷകളും അഭിമുഖങ്ങളും നടത്തിയാണ് റാങ്ക് പട്ടിക തയ്യാറാക്കുന്നത്. മാസങ്ങളോളം നീണ്ട തയ്യാറെടുപ്പുകൾക്ക് ശേഷം റാങ്ക് ലിസ്റ്റിൽ ഇടംപിടിച്ചവർ പുറത്തുനിൽക്കുമ്പോഴാണ് കാലാവധി കഴിഞ്ഞവർക്ക് വീണ്ടും നീട്ടിനൽകുന്നത്. വൻ തുക ശമ്പള ആനുകൂല്യങ്ങളും പ്രത്യേക അലവൻസുകളുമുള്ള വിജിലൻസ് വിഭാഗത്തിൽ തങ്ങളുടെ പ്രിയപ്പെട്ടവരെ നിലനിർത്താൻ നീക്കം നടക്കുന്നുവെന്ന ആരോപണം ശക്തമാണ്. വിഷയം മുഖ്യമന്ത്രിയുടെ ശ്രദ്ധയിൽപ്പെടുത്താനും നിയമപരമായ വഴികൾ തേടാനും ഒരുങ്ങുകയാണ് ഡെപ്യൂട്ടേഷൻ പ്രതീക്ഷിക്കുന്ന ഉദ്യോഗസ്ഥർ.
