തിരുവനന്തപുരം: നടി മിനു മുനീർ നിരവധി താരങ്ങൾക്കും സിനിമാ അണിയറ പ്രവർത്തകർക്കും എതിരെ രംഗത്തെത്തിയതിന് പിന്നാലെ പ്രതികരണവുമായി നടൻ മണിയൻപിള്ള. ആരോപണം ധാരാളം വരും. പണം തട്ടാൻ വേണ്ടിയും അവസരം കിട്ടാത്തതിൽ ദേഷ്യമുള്ളവരും അടക്കം ആരോപണവുമായി വരുമെന്നും അദ്ദേഹം കുറ്റപ്പെടുത്തി. ആരോപണങ്ങളുടെ യഥാർത്ഥ വസ്തുതകൾ പുറത്തുകൊണ്ടുവരാൻ അന്വേഷണം വേണമെന്നും അദ്ദേഹം ആവശ്യപ്പെട്ടു.
എൽസമ്മ എന്ന ആൺകുട്ടിയ്ക്ക് ഒപ്പം എന്ന സിനിമയിൽ മിന്നുവിനൊപ്പം അഭിനയിച്ചിട്ടുണ്ട്. തനിക്ക് എതിരായ ആരോപണം തെറ്റുകാരൻ ആണെങ്കിൽ എന്നെയും ശിക്ഷിക്കണം. എല്ലാ ആരോപണങ്ങളും സർക്കാർ അന്വേഷിക്കട്ടെയെന്നും വഴിവിട്ട രീതിയിൽ അമ്മയിൽ അംഗത്വം എടുക്കാൻ സാധിക്കില്ലെന്നും മണിയൻപിള്ള രാജു പറഞ്ഞു.
മുകേഷ് ഉൾപ്പെടെ ഏഴുപേർക്കെതിരെ ആരോപണവുമായാണ് നടി മിനു മുനീർ രംഗത്തെത്തിയത്. 2013ൽ ലൈംഗിക അതിക്രമം ഉൾപ്പെടെ മോശംപെരുമാറ്റം നേരിട്ടെന്ന് മിനു വെളിപ്പെടുത്തി. മുകേഷ്, മണിയൻപിള്ള രാജു, ഇടവേള ബാബു, ജയസൂര്യ എന്നിവർക്ക് എതിരെയാണ് ആരോപണം. അഡ്ജസ്റ്റ്‌മെൻറുകൾ സഹിക്കാൻ കഴിയാതെ മലയാളം സിനിമയിൽനിന്ന് അകന്നുവെന്നും ആരോപിതർക്കെതിരെ നടപടി വേണമെന്നും മിനു മുനീർ ആവശ്യപ്പെട്ടു.
ജയസൂര്യയുടെ ഭാഗത്തുനിന്നാണ് മോശമായ പെരുമാറ്റം ഉണ്ടായത്. സെക്രട്ടേറിയറ്റിലായിരുന്നു ഷൂട്ടിങ്. റസ്റ്റ് റൂമിൽ പോയിട്ടുവന്നപ്പോൾ ജയസൂര്യ പുറകിൽനിന്നു കെട്ടിപ്പിടിച്ചു. പിന്നീട് ചുണ്ടിൽ ചുംബിച്ചു. ഫ്‌ലാറ്റിലേക്ക് വരാൻ ക്ഷണിച്ചു. പിന്നീട് ശല്യം ഉണ്ടായില്ല. ആരോടെങ്കിലും ഇക്കാര്യം പറയാൻ പേടിയായിരുന്നെന്നും നടി പറഞ്ഞു.
