ഒടുവില്‍ കുറ്റസമ്മതം നടത്തി പാകിസ്താന്‍; കാർഗിൽ യുദ്ധത്തിലെ പങ്ക് ആദ്യമായി സമ്മതിച്ച് പാക് സൈന്യം

ഇസ്ലാമാബാദ്: ഇന്ത്യയ്‌ക്കെതിരെ നടന്ന കാർഗിൽ യുദ്ധത്തിലെ തങ്ങളുടെ  പങ്കുള്ളതായി പരസ്യമായി സമ്മതിച്ച് പാകിസ്താൻ സൈന്യം. ഇതാദ്യമായാണ് പാകിസ്താന്‍ കാർഗിൽ യുദ്ധത്തിലെ പങ്കിനെ കുറിച്ച് സമ്മതിക്കുന്നത്. രാജ്യത്തിൻ്റെ പ്രതിരോധ ദിനത്തോടനുബന്ധിച്ച് റാവൽപിണ്ടിയിൽ നടന്ന പരിപാടിയിൽ പാക് സൈനിക മേധാവി ജനറൽ അസിം മുനീർ ആണ് ഇക്കാര്യം തുറന്നു സമ്മതിച്ചത്.

1965, 1971, 1999 വർഷങ്ങളിലെ കാർഗിൽ യുദ്ധങ്ങളിൽ നിരവധി സൈനികർ വീരമൃത്യു വരിച്ചതായി അസിം മുനീർ പറഞ്ഞു. ‘1948, 1965, 1971, അല്ലെങ്കിൽ 1999 ലെ കാർഗിൽ യുദ്ധം ആകട്ടെ, ആയിരക്കണക്കിന് സൈനികർ പാകിസ്താനും ഇസ്ലാമിനും വേണ്ടി ജീവൻ ബലിയർപ്പിച്ചു’- പാക് സൈനിക മേധാവി വ്യക്തമാക്കി.

കാർഗിൽ യുദ്ധത്തിൽ തങ്ങളുടെ നേരിട്ടുള്ള പങ്ക് പാകിസ്താൻ സൈന്യം ഒരിക്കലും പരസ്യമായി അംഗീകരിച്ചിട്ടില്ല. അത് “മുജാഹിദീൻ അല്ലെങ്കിൽ സ്വാതന്ത്ര്യ സമര സേനാനികളുടെ” സൃഷ്ടിയാണെന്ന് ആയിരുന്നു ഇതുവരെയും ഔദ്യോഗികമായി അവകാശപ്പെട്ടിരുന്നത്. 1999-ലെ യുദ്ധത്തിൽ പാകിസ്താന്‍ ദയനീയമായ പരാജയം ഏറ്റുവാങ്ങി. ലഡാക്കിലെ ഏകദേശം മൂന്ന് മാസത്തെ യുദ്ധത്തിന് ശേഷം ടൈഗർ ഹിൽ ഉൾപ്പെടെയുള്ള കാർഗിൽ സെക്ടറിലെ നിയന്ത്രണരേഖയുടെ ഇന്ത്യൻ ഭാഗത്ത് നുഴഞ്ഞുകയറ്റക്കാർ കൈവശപ്പെടുത്തിയിരുന്ന സ്ഥാനങ്ങൾ ഇന്ത്യൻ സൈനികർ വിജയകരമായി തിരിച്ചുപിടിച്ചു.

കാർഗിൽ സെക്ടറിൽ നിന്ന് സൈനികരെ പിൻവലിക്കാൻ ഉത്തരവിടാൻ യുഎസ് പ്രസിഡൻ്റ് ബിൽ ക്ലിൻ്റണും പാക് പ്രധാനമന്ത്രി നവാസ് ഷെരീഫിനോട് ആവശ്യപ്പെട്ടു. യുദ്ധത്തടവുകാർ, അവരുടെ ശമ്പള പുസ്തകങ്ങൾ, യൂണിഫോം, ആയുധങ്ങൾ എന്നിവയുൾപ്പെടെ കാർഗിലിൽ പാകിസ്താൻ സൈന്യത്തിൻ്റെ പങ്കാളിത്തത്തിൻ്റെ നിരവധി തെളിവുകൾ ഇന്ത്യയുടെ പക്കലുണ്ട്. യുദ്ധാനന്തരം നിരവധി പാക് സൈനികരെ ഇന്ത്യൻ സൈന്യം കാർഗിലിൽ അടക്കം ചെയ്തു.

യുദ്ധത്തിൽ പാകിസ്ഥാനെതിരെ ഇന്ത്യ നേടിയ വിജയത്തിൻ്റെ സ്മരണാർത്ഥം ഇന്ത്യ ജൂലൈ 26 ‘കാർഗിൽ വിജയ് ദിവസ്’ ആയി ആചരിക്കുന്നു. 545 സൈനികരാണ് പാകിസ്താൻ നുഴഞ്ഞുകയറ്റക്കാരോട് പോരാടി ജീവൻ ബലിയർപ്പിച്ചത്. കാർഗിലിൽ കൊല്ലപ്പെട്ട സൈനികരുടെ മൃതദേഹം ഏറ്റുവാങ്ങാൻ പാകിസ്താൻ സൈന്യം വിസമ്മതിച്ചിരുന്നു. യുദ്ധത്തിൽ കൊല്ലപ്പെട്ട പാക് ഉദ്യോഗസ്ഥരുടെ മൃതദേഹങ്ങൾ അധികൃതർ രഹസ്യമായി അന്വേഷിച്ചിരുന്നു.