എറണാകുളം: എൻഫോഴ്സ്മെന്റ് ഡയറക്ടറേറ്റിന്റെ സമൻസുകളെ ചോദ്യം ചെയ്ത് കിഫ്ബിയും മുൻ ധനമന്ത്രി തോമസ് ഐസക്കും സമർപ്പിച്ച ഹർജികളിൽ ഹൈക്കോടതി ഉടൻ വിധി പറയും. ഇതോടു കൂടി കോടതി നടപടികളിൽ കുരുങ്ങി അന്വേഷണം മരവിച്ച മസാല ബോണ്ട് കേസ് വീണ്ടും സജീവമാകാൻ പോവുകയാണ്.
കിഫ്ബി ഡയറക്ടർ ബോർഡിന്റെ തീരുമാനത്തിന്റെ പേരിൽ തന്റെ വ്യക്തിപരമായ വിവരങ്ങളടക്കം ആവശ്യപ്പെട്ട് ഇ.ഡി തുടർച്ചയായി സമൻസയച്ചതിനെ ഐസക്ക് കോടതിയിൽ ചോദ്യം ചെയ്തിരുന്നു. ഇത് പ്രകാരം കിഫ്ബി ഉദ്യോഗസ്ഥർ ഹാജരായെങ്കിലും തോമസ് ഐസക് ഇ.ഡിക്ക് മുന്നിൽ എത്തിയിരുന്നില്ല. എന്നാൽ വിഷയം പരിശോധിക്കാനുള്ള അധികാരം റിസർവ് ബാങ്കിനാണെന്നും ഇ.ഡിയുടേത് അധികാരത്തിനു പുറത്തുള്ള ഇടപെടലാണെന്നുമായിരിന്നു കിഫ്ബിയുടെ വാദം.
ഇത് സംബന്ധിച്ച കേസ് ജൂലായ് അവസാന വാരം വാദം പൂർത്തിയാക്കി ജസ്റ്റിസ് ടി.ആർ. രവി ഹർജികൾ വിധി പറയാൻ മാറ്റിയിരുന്നു. ഹൈക്കോടതി വിധി ഉടൻ പുറത്ത് വരുന്നതോടെ നൂലാമാലകൾ ഒഴിഞ്ഞ് കിഫ്ബി കേസ് വീണ്ടും സജീവമാകും. ഇതോടു കൂടെ തോമസ് ഐസക്കിനുള്ള കുരുക്കുകൾ മുറുകുകയാണ്.
Discussion about this post