ബംഗളൂരു : ബംഗളൂരുവിൽ താമസിക്കുന്നവരിൽ അധികവും വടക്കേ ഇന്ത്യക്കാരാണെന്ന പ്രസ്താവനയുമായി ഇൻസ്റ്റഗ്രാം ഇൻഫ്ളുവൻസർ. ബംഗളൂരുവിലെ കൊറമംഗളയിൽ വെച്ച് എടുത്ത വീഡിയോയിലാണ് സുഗന്ധ് ശർമ്മ വിവാദ പ്രസ്താവന നടത്തിയത്.
വടക്കേ ഇന്ത്യക്കാർ ബംഗളൂരു വിട്ട് പോയാൽ ഇവിടെ ജീവിക്കാൻ ആരും ഉണ്ടാകില്ല എന്നാണ് ഇൻഫ്ളുവൻസർ പറഞ്ഞത്. പിജി റൂമുകളും ക്ലബ്ബുകളും അനാഥമാകും. വടക്കേ ഇന്ത്യക്കാർ പോയാൽ ഇവിടെ വാടകയ്ക്ക് നിൽക്കാൻ പോലും ആരുമുണ്ടാകില്ല എന്നും യുവതി വീഡിയോയിൽ കൂട്ടിച്ചേർത്തു. ഇത് വൈറലായതോടെ എതിർപ്പുമായി നിരവധി പേർ രംഗത്തെത്തി. നഗരത്തിന്റെ സംസ്കാരത്തെയും പൈതൃകത്തെയും അനാദരിക്കുന്ന തരത്തിലുള്ള പരാമർശങ്ങളാണ് യുവതി നടത്തിയത് എന്ന പ്രതികരണങ്ങളാണ് സെലിബ്രിറ്റികളിൽ നിന്നുൾപ്പെടെ ലഭിച്ചത്. ഇതോടെ യുവതി ക്ഷമ ചോദിച്ചുകൊണ്ട് രംഗത്തെത്തി.
തനിക്ക് ബംഗളൂരു വളരെ ഇഷ്ടമാണ് എന്നാണ് പുതിയ വീഡിയോയിൽ യുവതി പറയുന്നത്. ”എന്റെ വീഡിയോയുടെ കമന്റ് ബോക്സിൽ മോശം പരാമർശങ്ങൾ നടത്തുന്നവരോടാണ് ഇത് പറയുന്നത്. ഞാനൊരു സഞ്ചാരിയാണ്. എവിടെ പോയാലും ആ സ്ഥലത്തെ സംസ്കാരം പഠിക്കാൻ ഞാൻ ശ്രമിക്കും. ഈ നഗരത്തെയും ഇവടുത്തെ സംസ്കാരത്തെയും ഇന്ത്യാ മഹാരാജ്യത്തെയും ഞാൻ ബഹുമാനിക്കുന്നുണ്ട്. ഇന്ത്യയുടെ ഏത് ഭാഗത്ത് നിന്ന് വന്നവരാണെങ്കിലും നാമെല്ലാം ഒരേ രാജ്യക്കാരാണ്, ഇന്ത്യക്കാരാണ്.” യുവതി പറഞ്ഞു.
Discussion about this post