ന്യൂഡൽഹി : യുക്രൈന്റെ സമാധാനവും സ്ഥിരതയും പുനഃസ്ഥാപിക്കുന്നതിനുള്ള ഇന്ത്യയുടെ പിന്തുണ അറിയിച്ച പ്രധാനമന്ത്രിക്ക് നന്ദി അറിയിച്ച് വൊളോഡിമിർ സെലൻസ്കി. യുക്രൈൻ പ്രസിഡന്റ് വൊളോഡിമിർ സെലൻസ്കിയുമായി പ്രധാനമന്ത്രി നരേന്ദ്രമോദി കൂടിക്കാഴ്ച നടത്തിയിരുന്നു. ഇതിന് പിന്നാലെയാണ് സെലൻസ്കി നന്ദി അറിയിച്ചത്. യുക്രൈന്റെ ആവശ്യപ്രകാരമായിരുന്നു മോദി കൂടിക്കാഴ്ച നടത്തിയത്.
മൂന്നു ദിവസത്തെ പ്രധാനമന്ത്രിയുടെ യുഎസ് പര്യടനത്തിനിടെ തിങ്കളാഴ്ച ന്യൂയോർക്കിൽ വച്ചാണ് സെലൻകിയെ കണ്ടത്. ഒരു മാസത്തിനുള്ളിൽ മോദിയും സെലൻസ്കിയും തമ്മിൽ നടക്കുന്ന രണ്ടാമത്തെ കൂടിക്കാഴ്ചയാണിത്.
നമ്മുടെ പരമാധികാരത്തിനും പ്രാദേശിക അഖണ്ഡതയ്ക്കും പ്രധാനമന്ത്രി മോദി നൽകിയ വ്യക്തമായ പിന്തുണക്ക് ഞാൻ നന്ദി അറിയിക്കുന്നു. സംഘർഷത്തിൽ ഇന്ത്യയുടെ നയതന്ത്ര നിലപാട് ഊന്നിപ്പറഞ്ഞുകൊണ്ട് സെലെൻസ്കി എക്സിൽ കുറിച്ചു.
സംഘർഷം പരിഹരിക്കാനും യുദ്ധ മേഖലയിൽ സമാധാനം പുനഃസ്ഥാപിക്കാൻ ഇന്ത്യയുടെ പിന്തുണ മോദി ആവർത്തിച്ചു.സെലൻസ്കിയുമായി കൂടിക്കാഴ്ച നടത്തിയതിന്റെ ഫോട്ടോകൾ പ്രധാനമന്ത്രി നരേന്ദ്ര മോദി എക്സിൽ പങ്കുവെച്ചിട്ടുണ്ട്. ആഗസ്റ്റിലെ യുക്രൈൻ സന്ദർശനത്തിന്റെ ഭാഗമായി ഇരു രാജ്യങ്ങളും തമ്മിലുള്ള ഉഭയകക്ഷി ബന്ധം ശക്തിപ്പെടുത്താനെടുത്ത തീരുമാനം നടപ്പിലാക്കുന്നതിൽ ഇന്ത്യ പ്രതിജ്ഞാബദ്ധമാണെന്നും, യുക്രൈൻ സംഘർഷം പരിഹരിച്ച് സമാധാനവും സ്ഥിരതയും പുനഃസ്ഥാപിക്കുന്നതിൽ ഇന്ത്യയുടെ പിന്തുണ ഊട്ടിയുറപ്പിക്കുന്നുവെന്നും പ്രധാനമന്ത്രി എക്സിൽ കുറിച്ചു.
Discussion about this post