ഐ ഐ ടി കളിലടക്കം പ്ലേസ്മെന്റ് പകുതിയായി; എഞ്ചിനീയറിംഗ് ബിരുദധാരികൾ ജോലി കണ്ടെത്താൻ പാടുപെടുന്നതിൻ്റെ ആറ് കാരണങ്ങൾ

ന്യൂഡൽഹി: 23 ഐഐടികളിൽ നിന്നുള്ള ഡാറ്റയെ അടിസ്ഥാനമാക്കിയുള്ള സമീപകാല റിപ്പോർട്ട് അനുസരിച്ച്, അടുത്ത കാലത്തായി ക്യാമ്പസ്സ് പ്ലേസ്മെന്റ് ലഭിക്കാത്ത ഐഐടിക്കാരുടെ എണ്ണം ഇരട്ടിയിലധികമായെന്ന് റിപ്പോർട്ട് .ഐ ഐ ടി ക്യാമ്പസ് പ്ലെയ്‌സ്‌മെൻ്റിന് ശേഷം 8,000 വിദ്യാർത്ഥികൾക്കാണ് 2024 ൽ ജോലി ലഭിക്കാതിരുന്നത് . 2023-ൽ ഇത് 4,170 ആയിരുന്നു, ഏതാണ്ട് ഇരട്ടിയിലധികം വർദ്ധന. ഇതിന്റെ കാരണമായി വിദഗ്ധർ ചൂണ്ടി കാണിക്കുന്നത് പ്രധാനമായും ആറു കാര്യങ്ങളാണ്

1. സ്കിൽ ഗാപ്: സാങ്കേതിക വിദ്യയുടെ തീവ്ര ഗതിയിലുള്ള മുന്നേറ്റത്തോട് പിടിച്ചു നിൽക്കാനും അതിനോട് അഡാപ്റ്റ് ചെയ്യാനും പല വിദ്യാർത്ഥികൾക്കും കഴിയുന്നില്ല. ബിരുദധാരികളിൽ ഒരു വലിയ ഭാഗത്തിന് തൊഴിലുടമകൾക്ക് ആവശ്യപ്പെടുന്ന തൊഴിൽ നൈപുണ്യം ഇല്ല.

2. കാമ്പസ് പ്ലെയ്‌സ്‌മെൻ്റുകളിലെ അമിത ആശ്രയം: പരമ്പരാഗതമായി, ഉയർന്ന ശമ്പളമുള്ള ക്യാമ്പസ് പ്ലേസ്‌മെൻ്റുകളുടെ പര്യായമായാണ് ഐഐടികൾ അറിയപ്പെട്ടിരുന്നത് . എന്നിരുന്നാലും, വർദ്ധിച്ചുവരുന്ന എഞ്ചിനീയറിംഗ് ബിരുദധാരികളുടെ എണ്ണം ഉയർന്ന മത്സരത്തിലേക്ക് നയിക്കുകയും, ഇത് എല്ലാവരും പ്ലെയ്സ്ഡ് ആകാൻ സാധിക്കാത്ത സാഹചര്യത്തിലേക്ക് നയിക്കുകയും ചെയ്തു.

3. സോഫ്റ്റ് സ്‌കില്ലുകളുടെ അഭാവം: സാങ്കേതിക വൈദഗ്ധ്യം ഒരു അനിവാര്യതയാണെങ്കിലും , ആശയവിനിമയം, ടീം വർക്ക്, പ്രശ്‌നപരിഹാരം തുടങ്ങിയ ശക്തമായ സോഫ്റ്റ് സ്‌കിൽ ഉള്ള ഉദ്യോഗാർത്ഥികളെയാണ് തൊഴിലുടമകൾ കൂടുതലായി തേടുന്നത് . പല എഞ്ചിനീയർമാർക്കും ഈ കഴിവുകളുടെ അഭാവം അവരുടെ തൊഴിൽ സാധ്യതയെ തടസ്സപ്പെടുത്തുന്നു

4. സാമ്പത്തിക മാന്ദ്യങ്ങളും വ്യവസായ പ്രവണതകളും: സാമ്പത്തിക വ്യതിയാനങ്ങളും വ്യവസായ മുൻഗണനകളിലെ മാറ്റങ്ങളും എഞ്ചിനീയർമാരുടെ തൊഴിൽ ലഭ്യതയെ ബാധിച്ചിട്ടുണ്ട് . ഉദാഹരണത്തിന്, ഒരുകാലത്ത് പ്രധാന റിക്രൂട്ടർമാരായിരുന്ന ഐടി, ഇ-കൊമേഴ്‌സ് തുടങ്ങിയ മേഖലകളിൽ മാന്ദ്യം അനുഭവപ്പെട്ടത് തൊഴിലവസരങ്ങളെ സാരമായി ബാധിച്ചിട്ടുണ്ട്.

5. വലിയ പ്രതീക്ഷകൾ: എഞ്ചിനീയറിംഗ് എല്ലായ്പ്പോഴും ഒരു ലാഭകരമായ കരിയർ പാതയായിട്ടാണ് കണക്കാക്കുന്നത്. അത് കൊണ്ട് തന്നെ നിരവധി ബിരുദധാരികൾക്കിടയിൽ ശമ്പള പ്രതീക്ഷകൾ വളരെ ഉയർന്നതാണ്. ഇതും പ്ലേസ്മെന്റ് കുറയുന്നതിന്റെ കാരണമായി പറയപ്പെടുന്നു.

6. ലിമിറ്റഡ് ഇൻഡസ്ട്രി എക്സ്പോഷർ: പല എഞ്ചിനീയറിംഗ് പ്രോഗ്രാമുകൾക്കും വേണ്ടത്ര ഇൻഡസ്ട്രി എക്സ്പോഷറും പ്രായോഗിക പരിശീലനവും ഇല്ല, ഇത് ബിരുദധാരികൾക്ക് പ്രൊഫഷണൽ റോളുകളിലേക്ക് സുഗമമായി മാറുന്നത് ബുദ്ധിമുട്ടാക്കുന്നു.