തിരുവനന്തപുരം: കനത്ത ചൂടിന് ആശ്വാസമായി സംസ്ഥാനത്ത് ഇന്ന് മഴ ലഭിക്കും. കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പിന്റെ അടിസ്ഥാനത്തിൽ നാല് ജില്ലകളിൽ യെല്ലോ അലർട്ട് ഏർപ്പെടുത്തി. മഴയ്‌ക്കൊപ്പം ശക്തമായ കാറ്റിനും ഇടിമിന്നലിനും സാദ്ധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം അറിയിച്ചു. ഇന്ന് മുതൽ ഏഴ് ദിവസം വരെയാകും സംസ്ഥാനത്ത് മഴ ലഭിക്കുക.
ലക്ഷദ്വീപിന് മുകളിലായി ചക്രവാതച്ചുഴി നിലനിൽക്കുന്നുണ്ട്. ഇതാണ് കേരളത്തിൽ പരക്കെ മഴയ്ക്ക് കാരണം ആകുന്നത്. ഇതിന് പുറമേ വടക്കൻ ബംഗാൾ ഉൾക്കടലിന് മുകളിലായി ഇന്ന് ന്യൂനമർദ്ദം രൂപം കൊള്ളും. ഇതും സംസ്ഥാനത്ത് വ്യാപക മഴയ്ക്ക് കാരണം ആകുന്നുണ്ട്.
ഒരാഴ്ച മഴ നീളുന്ന പശ്ചാത്തലത്തിൽ വരും ദിവസങ്ങളിൽ യെല്ലോ അലർട്ട് ഏർപ്പെടുത്തിയിട്ടുണ്ട്. നാളെ രണ്ട് ജില്ലകളിലാണ് യെല്ലോ അലർട്ട്. ഞായറാഴ്ച 5 ജില്ലകളിലും യെല്ലോ അലർട്ടാണ്. തിങ്കളാഴ്ചയും മലപ്പുറം മുതൽ കാസർകോട് വരെയുള്ള അഞ്ച് ജില്ലകളിൽ യെല്ലോ അലർട്ടുണ്ട്. മോശം കാലാവസ്ഥയുടെ സാഹചര്യത്തിൽ തീരമേഖലകളിൽ താമസിക്കുന്നവർ ജാഗ്രത പാലിക്കണം എന്ന് നിർദ്ദേശം നൽകി. ഉയർന്ന തിരമാലയ്ക്കും കടലാക്രമണത്തിനും സാദ്ധ്യതയുണ്ട്. എന്നാൽ മത്സ്യത്തൊഴിലാളികൾക്ക് മത്സ്യബന്ധനത്തിന് പോകുന്നതിൽ തടസ്സമില്ല.
Discussion about this post