പാകിസ്ഥാനിലെ സിന്ധ് പ്രവിശ്യയില് വര്ധിച്ച് വരുന്ന ദുരഭിമാന കൊലപാതകങ്ങളില് ആശങ്ക രേഖപ്പെടുത്തി സുഹായ് ഓര്ഗനൈസേഷന്. 2024 ജനുവരി മുതല് ജൂണ് വരെ സിന്ധ് പ്രവിശ്യയില് 101 സ്ത്രീകളും പുരുഷന്മാരും ദുരഭിമാന കൊലയ്ക്ക് ഇരയായിട്ടുണ്ടെന്ന് സിന്ധ് സുഹായ് ഓര്ഗനൈസേഷനെ ഉദ്ധരിച്ച് എക്സ്പ്രസ് ട്രിബ്യൂണ് റിപ്പോര്ട്ട് ചെയ്തു.
രാജ്യത്തെ ദുരഭിമാനക്കൊലകളില് ഭൂരിഭാഗവും നടന്നിരിക്കുന്നത് സിന്ധിലെ ജാക്കോബാബാദ് ജില്ലയിലാണ്. ഇവിടെ 22 സ്ത്രീകളും 12 പുരുഷന്മാരുമാണ് കൊല്ലപ്പെട്ടത്. കാഷ്മോറില് 17 സ്ത്രീകളും 6 പുരുഷന്മാരും കൊല്ലപ്പെട്ടു. സുക്കൂറില് 23 പേരും ഖൈര്പൂരില് 20 പേരും ഘോട്ട്കിയില് 19 പേരും ലാര്ക്കാനയില് 12 പേരും പ്രവിശ്യയിലെ മറ്റ് ജില്ലകളിലുമായി 76 പേരുമാണ് കൊല്ലപ്പെട്ടതെന്നാണ് എക്സ്പ്രസ് ട്രിബ്യൂണ് റിപ്പോര്ട്ട് ചെയ്തത്.
എന്നാല് നിരവധി സംഭവങ്ങള് ഇനിയും റിപ്പോര്ട്ട് ചെയ്യപ്പെടാതെ കിടക്കുന്നുണ്ടെന്നും റിപ്പോര്ട്ടില് പറയുന്നു. പരാതികള് രജിസ്റ്റര് ചെയ്യുന്ന സന്ദര്ഭങ്ങളില് കൊല്ലപ്പെട്ട സ്ത്രീകളുടെ കുടുംബങ്ങള് തന്നെ നിയമനടപടി സ്വീകരിക്കാന് തയാറാവാത്ത സാഹര്യങ്ങള് ഉണ്ടെന്നും റിപ്പോര്ട്ടില് പറയുന്നു. പല ഘട്ടങ്ങളിലും ഒത്തുതീര്പ്പിലെത്തുമെന്നും റിപ്പോര്ട്ട് പറയുന്നു.
കുടുംബത്തെയോ സമുദായത്തെയോ അപമാനിച്ചുവെന്ന് ആരോപിക്കപ്പെടുന്ന സ്ത്രീകളെ ഏകപക്ഷീയമായി കൊന്ന് കുഴിച്ചുമൂടുന്നതാണ് രീതി. കുടുംബങ്ങള് ഇതിനെ ആത്മഹത്യയെന്ന് പറഞ്ഞ് മുടിവയ്ക്കുകയാണ് പതിവ്. അടുത്തിടെ, സലേഹ് പാട് ഏരിയയില് ഒരാള് ഭാര്യയെ അക്രമിച്ച ശേഷം ജീവനോടെ കുഴിച്ചുമൂടിയ സംഭവമുണ്ടായിരുന്നു.ഇത്തരം കൊലപാതകങ്ങള് ദാരിദ്ര്യം, വിദ്യാഭ്യാസമില്ലായ്മ, ഗോത്ര വ്യവസ്ഥകള്, സ്വത്ത് തര്ക്കങ്ങള് എന്നിവയുമായി ബന്ധപ്പെട്ടിരിക്കുന്നുവെന്ന് എക്സ്പ്രസ് ട്രിബ്യൂണ് റിപ്പോര്ട്ട് പറയുന്നു.
Discussion about this post