തിരുവനന്തപുരം: ചൈനീസ് ഭക്ഷ്യോത്പന്നങ്ങള്ക്ക് ഫൈവ്സ്റ്റാര് റേറ്റിങ് നല്കിയാല് പണം നല്കാമെന്ന് പറഞ്ഞ് യുവാവില് നിന്ന് 26 ലക്ഷം രൂപ തട്ടിയ രണ്ട് പേര് പിടിയില്. കോഴിക്കോട് നരിക്കുനി പാറന്നൂര് ആരീക്കല് ഹൗസില് അസര് മുഹമ്മദ് (29), കൊയിലാണ്ടി കോതമംഗലം വരണ്ട സ്വദേശി അക്ഷയ (28) എന്നിവരാണ് അറസ്റ്റിലായത്.
കുളത്തൂര് സ്വദേശിയായ ഷൈന് ആണ് തട്ടിപ്പിന് ഇരയായത്. ചൈനീസ് ഭക്ഷ്യ ഉത്പന്നങ്ങള്ക്ക് ഓണ്ലൈനില് ഫൈവ്സ്റ്റാര് റേറ്റിങ് നല്കുന്ന ജോലിയുടെ പരസ്യം ഇന്സ്റ്റഗ്രാമില് കണ്ടാണ് ഷൈന് തട്ടിപ്പു സംഘത്തെ സമീപിച്ചത്. ഇങ്ങനെ ചെയ്യുമ്പോള് പണം അക്കൗണ്ടിലേക്ക് കയറുമെന്ന് പറഞ്ഞായിരുന്നു തട്ടിപ്പ്.
ആദ്യഘട്ടത്തില് പതിനായിരം രൂപ അവര് പറഞ്ഞ അക്കൗണ്ടില് നിക്ഷേപിച്ചതിനു പിന്നാലെ തട്ടിപ്പുസംഘം 999 രൂപ ഷൈനിന്റെ അക്കൗണ്ടിലേക്കു നല്കി. ഇത്തരത്തില് ഷൈനിന്റെ വിശ്വാസം പിടിച്ചുപറ്റിയ സംഘം പല തവണയായി 26 ലക്ഷത്തോളം രൂപ ഇയാളില്നിന്നു തട്ടിയെടുത്തു. പണം ലഭിക്കാതെ വന്നപ്പോള് സാങ്കേതികത്തകരാറാണെന്നും നിങ്ങളുടെ പണം അക്കൗണ്ടില് സുരക്ഷിതമാണെന്നും ഇവര് ഷൈനിനെ വിശ്വസിപ്പിച്ചു. പിന്നീട് ഇവരെ ബന്ധപ്പെടാന് സാധിക്കാതായപ്പോഴാണ് താന് പറ്റിക്കപ്പെട്ടെന്ന് മനസിലാക്കിയത്. തുടര്ന്ന് പൊഴിയൂര് പൊലീസില് പരാതി നല്കുതയായിരുന്നു.
തുടര്ന്ന് നടത്തിയ പൊലീസ് അന്വേഷണത്തിലാണ് പ്രതികള് പിടിയിലായത്. ഇത്തരത്തില് ഇവര് നിരവധിപ്പേരെ തട്ടിപ്പിന് ഇരയാക്കിയതായി സംശയിക്കുന്നതായി പൊഴിയൂര് പോലീസ് അറിയിച്ചു. പൊഴിയൂര് എസ്എച്ച്ഒ അബ്ദുള് കലാം ആസാദിന്റെ നേതൃത്വത്തില് എഎസ്ഐ ജയലക്ഷ്മി, സാജന്, സിപിഒ അജിത്ത് എന്നിവരടങ്ങുന്ന സംഘമാണ് പ്രതികളെ പിടികൂടിയത്.
Discussion about this post