ഐ.പി.എൽ 2026-ൽ ചെന്നൈ സൂപ്പർ കിംഗ്സിന്റെ കുതിപ്പിന് കരുത്തായി മലയാളി താരം സഞ്ജു സാംസൺ. രാജസ്ഥാൻ റോയൽസിൽ നിന്നുള്ള വമ്പൻ ട്രേഡിലൂടെ ചെന്നൈയിലെത്തിയ സഞ്ജു, ടീമിനെ പ്ലേ ഓഫ് പ്രതീക്ഷകളിലേക്ക് കൈപിടിച്ചുയർത്തുകയാണ്. ഈ വർഷം നടന്ന ടി20 ലോകകപ്പിലെ ‘പ്ലെയർ ഓഫ് ദി ടൂർണമെന്റ്’ എന്ന പദവിക്ക് പിന്നാലെ ഐ.പി.എല്ലിലും തകർപ്പൻ ഫോമിലാണ് സഞ്ജു.
ചെന്നൈ സൂപ്പർ കിംഗ്സിനായി കളിച്ച 10 മത്സരങ്ങളിൽ നിന്ന് ഇതിനോടകം 400-ലധികം റൺസ് സഞ്ജു അടിച്ചുകൂട്ടി. മുംബൈ ഇന്ത്യൻസിനും ഡൽഹി ക്യാപിറ്റൽസിനുമെതിരെ സെഞ്ച്വറി നേടിയ സഞ്ജു, കഴിഞ്ഞ മത്സരത്തിൽ ഡൽഹിക്കെതിരെ 87 റൺസുമായി പുറത്താകാതെ നിന്ന് ടീമിനെ വിജയത്തിലേക്ക് നയിച്ചു. സീസണിലെ തന്റെ മൂന്നാം സെഞ്ച്വറിക്ക് വെറും 13 റൺസ് അകലെയായിരുന്നു താരം.
റുതുരാജ് ഗെയ്ക്വാദിന് പകരം സഞ്ജു സി.എസ്.കെ ക്യാപ്റ്റനായേക്കുമെന്ന് ആരാധകർക്കിടയിൽ വലിയ ചർച്ചകൾ നടന്നിരുന്നു. എന്നാൽ ഇതിനെക്കുറിച്ച് ‘സൂപ്പർ കിംഗ്സ്’ പോഡ്കാസ്റ്റിൽ സഞ്ജു മറുപടി നൽകി”പുതിയൊരു വീട്ടിലേക്ക് (ടീമിലേക്ക്) എത്തുമ്പോൾ നമ്മൾ അവിടെ ഡിമാൻഡുകൾ വെക്കാറില്ല. ആദ്യം നമ്മുടെ കഴിവ് തെളിയിക്കുകയാണ് വേണ്ടത്. ഒരു മലയാളി എന്ന നിലയിൽ എന്നിൽ വിശ്വാസമർപ്പിച്ച ടീമിന് വേണ്ടി ജീവൻ നൽകി പോരാടാനാണ് ഞാൻ ആഗ്രഹിക്കുന്നത്.”
ക്യാപ്റ്റൻ റുതുരാജ് ഗെയ്ക്വാദിനെ സഞ്ജു വാനോളം പുകഴ്ത്തി. റുതുരാജ് ഒരു വ്യത്യസ്തനായ സൂപ്പർ സ്റ്റാറാണെന്നും, തന്നെ ചെന്നൈയിലേക്ക് ക്ഷണിച്ചത് ഗെയ്ക്വാദ് നേരിട്ടാണെന്നും സഞ്ജു വെളിപ്പെടുത്തി. അഞ്ച് വർഷം മറ്റൊരു ടീമിനെ നയിച്ച പരിചയമുള്ള തന്നെ സ്വന്തം ടീമിലേക്ക് വിളിക്കാൻ റുതുരാജ് കാണിച്ച ആത്മവിശ്വാസം തന്നെ അത്ഭുതപ്പെടുത്തിയെന്നും സഞ്ജു കൂട്ടിച്ചേർത്തു.
