തിരുവനന്തപുരം: മദ്യക്കുപ്പികളില്‍ സുരക്ഷിതത്വം ഉറപ്പാക്കാന്‍ പുതിയ നടപടികളുമായി ബിവറേജസ് കോര്പ്പറേഷന്. ഫെബ്രുവരിമുതല്‍ ക്യു.ആര്‍. കോഡ് നിര്‍ബന്ധമാക്കാനാണ് തീരുമാനിച്ചിരിക്കുന്നത്. എന്നാല്‍ മദ്യക്കമ്പനികള്‍ക്ക് നിലവില്‍ ഒരു കോടി രൂപവീതം അധിക ബാധ്യതവരുത്തുന്ന സംവിധാനം ഏര്‍പ്പെടുത്തുന്നത് സംബന്ധിച്ച് ധാരണയായിട്ടില്ല.
ക്യു.ആര്‍. കോഡ് സ്റ്റിക്കറിന്റെ ചെലവ് വഹിക്കാനായി കോര്പ്പറേഷന് സന്നദ്ധമാണെങ്കിലും യന്ത്രസംവിധാനങ്ങള്‍ക്ക് വേണ്ടിവരുന്ന മുതല്‍മുടക്കാണ് ഈ മദ്യക്കമ്പനികളെ പിന്തിരിപ്പിക്കുന്നത്. ഇതിന് വേണ്ടി ബിവറജസ് കോര്പ്പറേഷന് കടുംപിടിത്തം തുടര്‍ന്നാല്‍ മദ്യവിതരണം തടസ്സപ്പെടും. പ്രതിസന്ധി പരിഹരിക്കാന്‍ മദ്യക്കമ്പനികളെ ചര്‍ച്ചയ്ക്കായി വിളിപ്പിച്ചിട്ടുണ്ട്.
ഒരോ മദ്യക്കുപ്പിയും വേറിട്ട് തിരിച്ചറിയാന്‍ കഴിയുന്ന വിധത്തില്‍ ക്യു.ആര്‍. കോഡ് പതിക്കാനാണ് കോര്‍പ്പറേഷന്റെ തീരുമാനം. നിര്‍മാണ വേളയില്‍ ഡിസ്റ്റിലറികളില്‍നിന്നാണ് പതിക്കേണ്ടത്. കോര്പ്പറേഷന് മദ്യം നല്‍കുന്ന 100-ഓളം വിതരണക്കാര്‍ ഇതിനുള്ള സംവിധാനം സജ്ജീകരിക്കേണ്ടിവരും.
പൊതുമേഖലാ സ്ഥാപനമായ ട്രാവന്‍കൂര്‍ ഷുഗേഴ്സ് ആന്‍ഡ് കെമിക്കല്‍സ് മാത്രമാണ് നിലവില്‍ ക്യു.ആര്‍.കോഡ് സജ്ജീകരിച്ചിട്ടുള്ളത്. തിരുവല്ല ഫാക്ടറിയില്‍ ഇത് സജ്ജീകരിക്കാന്‍ ഒരു കോടി രൂപ ചെലവായിരുന്നു. പരീക്ഷണാടിസ്ഥാനത്തില്‍ തിരുവല്ല, നെടുമങ്ങാട് ഗോഡൗണുകളിലേക്ക് ക്യു.ആര്‍. കോഡ് പതിച്ച മദ്യം നല്‍കുന്നുണ്ട്.
Discussion about this post