രാഷ്ട്രീയ മാറ്റത്തിനൊരുങ്ങുമോ തമിഴ്‌നാട്; സംസ്ഥാന പര്യടനത്തിനൊരുങ്ങി വിജയ്

ചെന്നൈ:തന്റെ പുതിയ പാർട്ടിയുടെ ആശയങ്ങൾ ജനങ്ങളിലെത്തിക്കുക എന്ന ദൗത്യവുമായി സംസ്ഥാന പര്യടനത്തിനൊരുങ്ങി നടനും ടിവികെ അധ്യക്ഷനുമായ വിജയ്. ഡിസംബർ രണ്ടിന് കോയമ്പത്തൂരിലാണ് യാത്രയുടെ തുടക്കം. ഡിസംബർ 27ന് തിരുനെൽവേലിയിലാണ് മെഗാറാലിയോടെ സമാപനം. തന്റെ ആദ്യ യോഗത്തിൽ ഡി എം കെ ക്കെതിരെ ശക്തമായി രംഗത്ത് വന്നു കൊണ്ട് വിജയ് ശ്രദ്ധേയമായിരുന്നു. ദ്രാവിഡ രാഷ്ട്രീയത്തിൽ നിന്നും തമിഴ്നാട്ടുകാർ മാറിചിന്തിക്കാൻ സമയമായി എന്ന കാഴ്ചപ്പാടാണ് വിജയ് തന്റെ കഴിഞ്ഞ പ്രസംഗത്തിൽ പങ്കുവച്ചത്.

അതെ സമയം നവംബർ 1 ന് തമിഴ്നാട് ദിനം ആയി ആചരിക്കണമെന്ന് വിജയ് ഇന്നലെ അഭിപ്രായപ്പെട്ടു. ഭാഷാടിസ്ഥാനത്തിൽ തമിഴ്നാട് രൂപീകരിച്ചത്. 1956 നവംബർ ഒന്നിനാണ്. നവംബർ 1 തമിഴ്നാട് ദിനം ആയാൽ, തമിഴ് സംസാരിക്കുന്നവരെ ഒന്നിപ്പിക്കാനായി ജീവത്യാഗം ചെയ്തവർക്കുള്ള ആദരം ആകുമെന്നും വിജയ് പറഞ്ഞു.

ജൂലൈ 18 തമിഴ്നാട് ദിനം ആയി ആചരിക്കുമെന്ന് കഴിഞ്ഞ വർഷം സ്റ്റാലിൻ സർക്കാർ പ്രഖ്യാപിച്ചിരുന്നു. മദ്രാസ് സംസ്ഥാനത്തിന്റെ പേര് തമിഴ്നാട് എന്നാക്കി മാറ്റണമെന്ന പ്രമേയം അണ്ണാദുരൈ 1967ജൂലൈ 18നാണ് അവതരിപ്പിച്ചത്. അതുകൊണ്ടാണ് സ്റ്റാലിൻ സർക്കാർ ജൂലൈ 18 തമിഴ്നാട് ദിനമായി തെരഞ്ഞെടുത്തത്. ആ തീരുമാനം മാറ്റണമെന്നാണ് വിജയ് മുന്നോട്ട് വെക്കുന്ന കാഴ്ചപ്പാട്. ദശകങ്ങളായി ദ്രാവിഡ രാഷ്ട്രീയം പയറ്റികൊണ്ടിരിക്കുന്ന തമിഴ്‌നാട്ടിൽ വിജയുടെ നയങ്ങൾ ജനങ്ങൾ സ്വീകരിക്കുമോ എന്നാണ് രാഷ്ട്രീയ നിരീക്ഷകർ നോക്കുന്നത്

അതേസമയം, വിജയ്‍യെ വിമർശിക്കരുതെന്ന് പാർട്ടി വക്താക്കൾക്കും നേതാക്കൾക്കും അണ്ണാ ഡിഎംകെ നിർദ്ദേശം നല്‍കി. വിജയ് എഡിഎംകെയെ എതിർത്തിട്ടില്ലെന്നും അനാവശ്യമായി പ്രകോപനത്തിന് ശ്രമിക്കരുതെന്നുമാണ് നിർദ്ദേശം.