ആരോഗ്യത്തില്‍ ശ്രദ്ധ പുലര്‍ത്തുന്നവരുടെ ഇഷ്ട പാനീയങ്ങളില്‍ ഒന്നാണ് ഗ്രീന്‍ ടീ.എന്നാല്‍ ഇത് കുടിക്കുമ്പോള്‍ ശ്രദ്ധിക്കേണ്ട ചില കാര്യങ്ങളുണ്ട് അവ എന്തൊക്കെയാണെന്ന് നോക്കാം.
ഗ്രീന്‍ ടീ നല്ലതാണെന്ന് വെച്ച് അത് ഒരിക്കലും വെറും വയറ്റില്‍ കുടിക്കാന്‍ പാടില്ല. ശരീരഭാരം കുറയ്ക്കാന്‍ ഗ്രീന്‍ ടീ നല്ലതാണെന്ന് പറയപ്പെടുമ്പോഴും രാവിലെ വെറും വയറ്റില്‍ ആദ്യം കുടിക്കാതിരിക്കുന്നതാണ് നല്ലത്. വെറും വയറ്റില്‍ ഗ്രീന്‍ ടീ കുടിക്കുന്നത് നിര്‍ജലീകരണത്തിലേക്ക് നയിക്കുകയും ഗ്യാസ്ട്രിക് ആസിഡിന്റെ ഉത്പാദനത്തെ ഉത്തേജിപ്പിക്കുകയും ചെയ്യും.
ഇത് വയറിനെ അസ്വസ്ഥമാക്കുകയോ അള്‍സറിന് വരെ കാരണമാവുകയോ ചെയ്യും.
ശ്രദ്ധിക്കേണ്ട മറ്റൊരു കാര്യം ഇതു കുടിക്കേണ്ട സമയമാണ്. ഗ്രീന്‍ ടീയില്‍ കഫീന്‍, തിനൈന്‍ എന്നിവ അടങ്ങിയിരിക്കുന്നതിനാല്‍ ഉറങ്ങാന്‍ പോകുന്നതിനു തൊട്ടുമുമ്പ് ഒഴിവാക്കുന്നതാണ് നല്ലതെന്ന് ഡിംപിള്‍ ജംഗ്ദ നിര്‍ദേശിച്ചു. ഇത് ഉറക്കത്തെ തടസപ്പെടുത്തും. ഭക്ഷണത്തിനിടയിലുള്ള സമയമാണ് ഗ്രീന്‍ ടീ കുടിക്കാന്‍ ഏറ്റവും അനുയോജ്യം. എങ്കിലും, ഭക്ഷണത്തിന് രണ്ട് മണിക്കൂര്‍ മുമ്പും രണ്ട് മണിക്കൂര്‍ ശേഷവും ഗ്രീന്‍ ടീ കുടിക്കാന്‍ ശ്രദ്ധിക്കണം.
ഗുണങ്ങളേറെ
ഗ്രീന്‍ ടീ കലോറി രഹിത പാനീയമാണ്. ഗ്രീന്‍ ടീ സാധാരണയായി ചൂടോടെയും പഞ്ചസാര ചേര്‍ക്കാതെയുമാണ് കഴിക്കുന്നത്. അതിനാല്‍, ദിവസവും 2-3 കപ്പ് കുടിക്കുന്നത് ഒരു ദിവസത്തേക്കുള്ള നിങ്ങളുടെ കലോറി ഉപഭോഗത്തെ ബാധിക്കില്ല.
വിശപ്പ് തോന്നാതിരിക്കാനുള്ളഏറ്റവും നല്ല പാനീയമാണ് ഗ്രീന്‍ ടീ. ഇവ കുടിക്കുന്നത് വെള്ളം കുടിക്കുന്നത് പോലെയാണ്. കൂടുതല്‍ കുടിക്കുന്തോറും നിങ്ങള്‍ക്ക് പൂര്‍ണത അനുഭവപ്പെടും.
ആന്റിഓക്സിഡന്റുകള്‍ നിറഞ്ഞതാണ്. ഈ ആന്റിഓക്സിഡന്റുകള്‍ ഉപാപയപ്രവര്‍ത്തനം വര്‍ധിപ്പിക്കാനും ദഹനം ശക്തമാക്കാനും സഹായിക്കും. ഇവയില്‍ അടങ്ങിയിരിക്കുന്ന പോളിഫെനോളുകള്‍ ശരീരത്തെ വിഷവിമുക്തമാക്കാനും സഹായിക്കും.
Discussion about this post