ഇളവെയിലും പോക്കുവെയിലും കൊള്ളുന്നതാണ് ശരീരത്തിൽ വിറ്റാമിൻ ഡി ഉൽപാദിപ്പിക്കാനുള്ള ഏറ്റവും മികച്ച സമയമെന്നാണ് പണ്ടുമുതൽ ആളുകൾ കരുതിയിരുന്നത്. എന്നാൽ ആ ധാരണ ഇപ്പോൾ തെറ്റാണെന്ന് കണ്ടെത്തിയിരിക്കുകയാണ് ഗവേഷകർ.
ശരീരത്തിന് വിറ്റാമിൻ ഡി ഉൽപാദിപ്പിക്കണമെങ്കിൽ യുവി സൂചിക മൂന്നിൽ കൂടുതലായിരിക്കണം. ഇത് സാധാരണയായി രാവിലെ 10 നും ഉച്ചയ്ക്ക് 12 മണിക്കും ഇടയിലുള്ള സമയത്താണ് സംഭവിക്കാറ്. എന്നാൽ ഇതൊക്കെ വർഷം, ലാറ്റിറ്റൂഡ്, കാലാവസ്ഥ, വായു മലിനീകരണം, ഭൂമിശാസ്ത്രപരമായ സ്ഥാനം എന്നിവയെ ആശ്രയിച്ച് മാറ്റം സംഭവിക്കാം. പുലർച്ചയും വൈകുന്നേരവുമുള്ള സമയം യുവിഎ രശ്മികളാണ് സൂര്യനിൽ നിന്ന് വരുന്നത്. ഇത് ശരീരത്തിൽ നൈട്രിക് ഓക്‌സൈഡ് ഉണ്ടാവാൻ നല്ലതാണ്.
സമയം എങ്ങനെ തിരിച്ചറിയാം
സൂര്യപ്രകാശത്തിന് കീഴിൽ നിൽക്കുമ്പോൾ നിഴലിന്റെ വലിപ്പം ശ്രദ്ധിക്കുക. നിങ്ങളുടെ ഉയരത്തെക്കാൾ നിഴൽ ചെറുതാണെങ്കിൽ അതാണ് കൃത്യസമയം. ഈ സമയം യുവിബി രശ്മികൾ ചർമത്തിൽ എത്തുന്നത് വിറ്റാമിൻ ഡി മികച്ച രീതിയിൽ ഉൽപാദിപ്പിക്കാൻ സാധിക്കും.
എന്നാൽ അറിയേണ്ട ഒരു കാര്യം ആവശ്യത്തിന് സൂര്യപ്രകാശം ലഭിച്ചാലും ഇരുണ്ട ചർമുള്ളവരിൽ, ആവശ്യത്തിന് വിറ്റാമിൻ ഡി ഉൽപാദിപ്പിക്കാൻ പ്രയാസമാണ്. കൂടാതെ പ്രായം കൂടുന്നതനുസരിച്ച് ശരീരത്തിൽ വിറ്റാമിൻ ഡി ഉൽപാദനം കുറയും. പൊണ്ണത്തടി, ദഹനസംബന്ധമായ തകരാറുകൾ, വൃക്കരോഗങ്ങൾ എന്നിവ നേരിടുന്ന പ്രായമായവരിലും വിറ്റാമിൻ ഡി പ്രോസസ് ചെയ്യാൻ കഴിയില്ല.
സൂര്യപ്രകാശം കൂടാതെ സാൽമൺ, അയല, ട്യൂണ, മത്തി തുടങ്ങിയ കൊഴുപ്പുള്ള മത്സ്യങ്ങളിൽ വിറ്റാമിൻ ഡി അടങ്ങിയിട്ടുണ്ട്. സൂര്യപ്രകാശം ഏൽക്കുന്ന കോഴികളിൽ നിന്നുള്ള മുട്ടകളും വിറ്റാമിൻ ഡിയുടെ നല്ല ഉറവിടമാണ്. ഫോർട്ടിഫൈഡ് പാൽ, ഓറഞ്ച് ജ്യൂസ്, ചീസ്, തൈര് തുടങ്ങിയവയിലും ചെറിയ അളവിൽ വിറ്റാമിൻ അടങ്ങിയിട്ടുണ്ട്.
