ചെന്നൈ : തമിഴ്നാട്ടിലെ തീരദേശ ജില്ലകൾ ഫെയ്ഞ്ചൽ ചുഴലിക്കാറ്റ് ഭീതിയിൽ. പല പ്രദേശങ്ങളിലും ഉയർന്ന വേലിയേറ്റവും മഴയും ഉൾപ്പെടെ പ്രക്ഷുബ്ധമായ കാലാവസ്ഥയാണുള്ളത്. ചുഴലിക്കാറ്റ് നാളെ വൈകുന്നേരം തീരപ്രദേശത്ത് എത്തുമെന്ന് ഇന്ത്യൻ കാലാവസ്ഥാ വകുപ്പ് (ഐഎംഡി) റിപ്പോർട്ട് ചെയ്തു.
വടക്കൻ തമിഴ്നാട്, പുതുച്ചേരി, തെക്കൻ ആന്ധ്രാപ്രദേശ് തീരങ്ങളിൽ കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. നിലവിൽ തെക്കുപടിഞ്ഞാറൻ ബംഗാൾ ഉൾക്കടലിൽ ആണ് ചുഴലിക്കാറ്റ് സ്ഥിതി ചെയ്യുന്നത്.
മണിക്കൂറിൽ 7 കിലോമീറ്റർ വേഗതയിൽ വടക്ക്-വടക്കുപടിഞ്ഞാറ് ദിശയിലേക്ക് ചുഴലിക്കാറ്റ് നീങ്ങുന്നതായും ഐഎംഡി അറിയിച്ചു.
ഫെയ്ഞ്ചൽ ചുഴലിക്കാറ്റ് ചെന്നൈയ്ക്ക് സമീപം തീരം തൊടാൻ സാധ്യതയുള്ളതിനാൽ, തമിഴ്നാട്ടിലെ ചെന്നൈ, കാഞ്ചീപുരം, ചെങ്കൽപട്ട്, തിരുവള്ളൂർ ജില്ലകളിൽ കനത്ത മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ഈ നാല് ജില്ലകളിലെ എല്ലാ സ്കൂളുകൾക്കും കോളേജുകൾക്കും ശനിയാഴ്ച തമിഴ്നാട് സർക്കാർ അവധി പ്രഖ്യാപിച്ചു. കൂടാതെ, കടലൂർ, വില്ലുപുരം, കല്ല്കുറിച്ചി, മയിലാടുംതുറൈ ജില്ലകളിലും കനത്ത മഴയ്ക്കും കാറ്റിനും സാധ്യതയുള്ളതിനാൽ സ്കൂളുകൾക്കും കോളേജുകൾക്കും അവധി പ്രഖ്യാപിച്ചിട്ടുണ്ടെന്നും സംസ്ഥാന സർക്കാർ അറിയിച്ചു.
Discussion about this post