കൊച്ചി: പ്രധാനമന്ത്രി നരേന്ദ്രമോദിയെ പുകഴ്ത്തി പ്രമുഖ വസ്ത്രവ്യാപാര ശാലയായ ശീമാട്ടിയുടെ ഉടമ ബീന കണ്ണൻ. ഒരാൾ വൃത്തിയായി രാജ്യം ഭരിക്കുന്നുണ്ടെങ്കിൽ അവരുമായി വേദി പങ്കിടുന്നതിൽ എന്താണ് തെറ്റെന്ന് ബീന കണ്ണൻ ചോദിച്ചു. പ്രധാനമന്ത്രി നരേന്ദ്രമോദി കേരളത്തിൽ എത്തിയപ്പോൾ വേദി പങ്കിട്ടതുമായി ബന്ധപ്പെട്ട ചോദ്യത്തിന് മറുപടി പറയുകയായിരുന്നു.
എന്തുകൊണ്ട് പാടില്ല?, ഒരാൾ വൃത്തിയായി രാജ്യം ഭരിക്കുന്നുണ്ടെങ്കിൽ അവരുമായി വേദി പങ്കിടുന്നതിൽ എന്താണ് തെറ്റെന്നായിരുന്നു ബീന കണ്ണന്റെ ചോദ്യം. ചെറുപ്പത്തിൽ ഞാൻ ഇന്ദിരാഗാന്ധിയെ അഭിനന്ദിച്ചിരുന്നു. എന്നാൽ ഇപ്പോൾ ഞാൻ കരുതുന്നു, ഞാൻ തെറ്റ് ചെയ്തിരിക്കാം. നമ്മുടെ രാജ്യം നല്ല രീതിയിൽ നടക്കണം എന്ന ഒറ്റ ഉദ്ദേശമേ എനിക്ക് ഉള്ളൂവെന്ന് അവർ കൂട്ടിച്ചേർത്തു.
ചെറുപ്പക്കാർ എന്തുകൊണ്ട് നാട്ടിൽ വന്ന് രാജ്യം ഭരിക്കുന്നില്ല എന്ന് ചോദിക്കേണ്ട അവസ്ഥയിലാണ്. ഉള്ളവരെ കൂടി നിങ്ങൾ നാടുകടത്തി വിടുന്നുണ്ട്. കെട്ടുംകെട്ടി വിട്ടിട്ടില്ലേ? മൊത്തത്തിൽ എന്നെ കണ്ടിട്ട് ഒരു മണ്ടിയാണെന്ന് തോന്നുന്നുണ്ടോ? മോദിയുമായി വേദി പങ്കിട്ടതിൽ ഏത് തരത്തിലുള്ള വ്യാഖ്യാനങ്ങൾ ഉണ്ടായാലും എന്റെ രീതി നേരെയാണെങ്കിൽ എനിക്ക് അത് നേരിടാൻ അറിയാമെന്ന് ബീന കണ്ണൻ വ്യക്തമാക്കി.
തന്റെ ഉദ്ദേശം നേരെ വാ നേരെ പോ എന്നതാണ്. വളഞ്ഞ വഴിയിൽ പോയാൽ അല്ലേ ഭയപ്പെടേണ്ടതുള്ളൂ. രാഷ്ട്രീയത്തിൽ ഇറങ്ങുന്നതുമായി ബന്ധപ്പെട്ട് തെരഞ്ഞെടുപ്പിന് മുൻപ് വിളിച്ച് ചോദിച്ച കക്ഷികളുണ്ട്. താൻ ധൈര്യമായി ചെയ്തോളൂ. താൻ ഇല്ല എന്നാണ് പറഞ്ഞത്. രാഷ്ട്രീയത്തിൽ ഇറങ്ങാൻ തനിക്ക് താത്പര്യമില്ലെന്ന് അവർ കൂട്ടിച്ചേർത്തു.
ഈ വർഷം ജനുവരിയിൽ തൃശൂരിൽ മഹിളാമോർച്ച സംഘടിപ്പിച്ച സ്ത്രീശക്തി സംഗമത്തിലാണ് ബീന കണ്ണൻ പ്രധാനമന്ത്രി നരേന്ദ്രമോദിയ്ക്കൊപ്പം വേദി പങ്കിട്ടത്. ശീമാട്ടിയിൽ വെള്ളിനൂലിൽ നെയ്തെടുത്ത ഷാളാണ് ബീന കണ്ണൻ പ്രധാനമന്ത്രിയെ അണിയിച്ചത്.
Discussion about this post