തിരുവനന്തപുരം: തിരുവനന്തപുരം ചിറയിന്‍കീഴിലെ ഒരു ഗോഡൗണില്‍ നിന്ന് പൊലീസ് പിടികൂടിയത് നാലു കോടിയുടെ നിരോധിത പുകയില ഉല്‍പ്പന്നങ്ങള്‍ . മിനറല്‍ വാട്ടറിന്റെ കച്ചവടത്തിന്റെ മറവിലാണ് ഈ കെട്ടിടം വാടകയക്ക് എടുക്കുകയും നിരോധിത ഉല്‍പ്പന്നങ്ങള്‍ സൂക്ഷിക്കുകയും ചെയ്തിരുന്നത്. ബംഗളൂരു കേന്ദ്രീകരിച്ചുള്ള മാഫിയ സംഘമാണ് ലഹരിവസ്തുക്കള്‍ കൊണ്ടുവന്നതിന് പിന്നില്‍. ലഹരിവസ്തു സൂക്ഷിച്ചിരുന്നതില്‍ വഞ്ചിയൂര്‍ സ്വദേശി ഷിജുവിനെ പൊലിസ് അറസ്റ്റ് ചെയ്തു. അഴൂര്‍ തെറ്റിച്ചിറയിലാണ് വിശാലമായ ഗോഡൗണ്‍.
എട്ടുമാസം മുമ്പാണ് വഞ്ചിയൂര്‍ സ്വദേശി ഷിജുവിന്റെ പേരില്‍ ഗോഡൗണ്‍ വാടക്കെടുത്തത്. നാട്ടുകാരുടെയും യൂണിയന്‍കാരുടെയും ശ്രദ്ധ തെറ്റിക്കാനാണ് മിനറല്‍ വാട്ടറിന്റെയും ബിസ്‌ക്കറ്റിന്റെയും ലോഡ് ഇറക്കിയത്. യൂണിയന്‍കാരുടെയും നാട്ടുകാരുടെയും ശ്രദ്ധ കുറഞ്ഞു തുടങ്ങിയതോടെ മിനറല്‍ വാട്ടറിന്റെ മറവില്‍ നിരോധിത ഉല്‍പ്പന്നങ്ങള്‍ കടത്തികൊണ്ടുവന്നു. കര്‍ണാടകയില്‍ നിന്നും കടത്തികൊണ്ടുവരുന്ന ഉല്‍പ്പന്നങ്ങള്‍ ഗോഡൗണില്‍ ശേഖരിച്ച് പല സ്ഥലങ്ങളിലായി വില്‍പന തുടങ്ങി.
സ്‌പെഷ്യല്‍ ഡ്രൈവിന്റെ ഭാഗമായി റൂറല്‍ ഷാഡോ സംഘം ഈ ഗോഡൗണ്‍ കേന്ദ്രീകരിച്ച് നിരീക്ഷണം നടത്തുകയായിരുന്നു. ഇന്ന് പുലര്‍ച്ചെയാണ് ഗോഡൗണില്‍ പൊലീസ് പരിശോധന നടത്തിയത്. 200 ചാക്കുകളിലായാണ് നിരോധിത ഉല്‍പ്പന്നങ്ങള്‍ സൂക്ഷിച്ചിരുന്നത്. ഗോഡൗണില്‍ നിന്നും കടകളിലേക്ക് ഉല്‍പ്പന്നങ്ങളെത്തിക്കാനും ഏജന്റുമാര്‍ ഉണ്ടായിരുന്നു. റൂറല്‍ എസ്പി കിരണ്‍ നാരായണന്റെ നേതൃത്വത്തിലാണ് അന്വേഷണം. ചിറയിന്‍കീഴ് പൊലീസാണ് കേസെടുത്തത്
Discussion about this post