ഇന്ത്യയിലെ ആദ്യ ഡോം സിറ്റി വരുന്നു; ഒരുങ്ങുന്നത് യുപിയിലെ മഹാകുംഭില്‍

ലഖ്‌നൗ: ഇന്ത്യയിലെ ആദ്യത്തെ ‘ഡോം സിറ്റി’ മഹകുംഭില്‍ ആരംഭിക്കാന്‍ ഉത്തര്‍പ്രദേശ് സര്‍ക്കാര്‍. മഹാകുംഭ് നഗറിലെ അരയിലാണ് ഇത് നിര്‍മ്മിക്കുക. 3 ഹെക്ടറില്‍ 51 കോടി രൂപ ചെലവു വരുന്ന തരത്തിലാണ് ഡോം സിറ്റി നിര്‍മ്മിക്കുന്നത്. വിനോദസഞ്ചാരികള്‍ക്ക് കാഴ്ചകള്‍ ആസ്വദിക്കാന്‍ കഴിയുന്ന തരത്തിലായിരിക്കും ഇതിന്റെ നിര്‍മാണം. ടൂറിസം വകുപ്പിന്റെ നേതൃത്വത്തില്‍ സ്വകാര്യ സഹകരണത്തോടെയായിരിക്കും നിര്‍മാണം. ആവശ്യമായ ഭൂമി ടൂറിസം വകുപ്പ് നല്‍കും.

ത്രിവേണിയില്‍ സ്വകാര്യ കമ്പനിയായ ഇവോ ലൈഫ് സ്‌പേസ് പ്രൈവറ്റ് ലിമിറ്റഡാണ് ഡോം സിറ്റി പദ്ധതിക്ക് മേല്‍നോട്ടം വഹിക്കുക. ഇതോടെ യോഗി സര്‍ക്കാര്‍ ടൂറിസത്തില്‍ പുതിയ ചരിത്രം സൃഷ്ടിക്കുമെന്ന് കമ്പനി ഡയറക്ടര്‍ അമിത് ജോഹ്രി പറഞ്ഞു. ഡോം സിറ്റിയില്‍ 44 താഴികക്കുടങ്ങള്‍ ഉണ്ടാകും, ഓരോന്നിനും 32×32 അടി വലുപ്പവും 15 മുതല്‍ 18 അടി വരെ ഉയരത്തിലുമായിരിക്കും നിര്‍മാണം. ബുള്ളറ്റ് പ്രൂഫും ഫയര്‍ പ്രൂഫും ഉള്‍പ്പെടെ 360 ഡിഗ്രി പോളികാര്‍ബണേറ്റ് ഷീറ്റുകള്‍ ഉപയോഗിച്ചാണ് താഴികക്കുടങ്ങള്‍ നിര്‍മ്മിക്കുന്നത്.

ഡോം സിറ്റിയില്‍ മൊത്തം 176 കോട്ടേജുകളാണ് നിശ്ചയിച്ചിരിക്കുന്നത്. ഓരോന്നിനും അത്യാധുനിക സൗകര്യങ്ങളും ഒറുക്കിയിട്ടുണ്ടാവും. എല്ലാ കോട്ടേജിലും എയര്‍ കണ്ടീഷനിംഗ്, ഗീസര്‍, ഭക്ഷണത്തിനുള്ള ക്രമീകരണങ്ങള്‍ എന്നിവയും ഉണ്ടായിരിക്കും. ഉത്സവസമയത്ത് 81,000 രൂപയും സാധാരണ ദിവസങ്ങളില്‍ 41,000 രൂപയുമാണ് കോട്ടേജിന്റെ വാടക. സ്‌നാന ഉത്സവ സമയത്ത് താഴികക്കുടത്തിന് 1,10,000 രൂപയും സാധാരണ ദിവസങ്ങളില്‍ 81,000 രൂപയുമാണ് വാടകയായി നിശ്ചയിച്ചിരിക്കുന്നത്.